ASTANA. 17 maýsym. Qyzylorda oblysynyń kásipkerler palatasynda aımaq kásipkerleriniń qatysýymen Qazaqstan Respýblıkasy Prezıdentiniń «Altyn sapa» syılyǵy men «Qazaqstannyń úzdik taýary» kórme-konkýrsyn baǵalaý ólshemine qatysty oqytý semınary ótti. Bul týraly Qyzylorda oblysy kásipkerlik palatasynyń baspasóz qyzmeti habarlasty.
Oqytý semınaryn «Altyn sapa» syılyǵy men «Qazaqstannyń úzdik taýary» kórme-konkýrsyna qatysýshylardyń qujattaryn qarap, baǵalaýda mol tájirıbesi bar úzdik sarapshy-aýdıtorlar: «Atameken» Ulttyq kásipkerler palatasynyń Áleýmettik-eńbek qatynastary departamentiniń sarapshysy Bınara Tólegenova men «NaSEkS» aksıonerlik qoǵamynyń sarapshysy Olga Leneva ótkizdi.
Joǵaryda atalǵan sharalarǵa qatysty «Atameken» Ulttyq kásipkerler palatasynyń áleýmettik-eńbek qatynastary departamentiniń sarapshysy Bınara Tólegenova: «Astana ekonomkalyq Forýmynyń qorytyndy esebine sáıkes biz 50 básekege qabiletti elderdiń qataryna endik. Básekege qabilettilik – bul birinshi kezekte halyqtyń turmys-jaǵdaıyn jaqsartýǵa áser etetin birden bir faktor bolyp tabylady. Qazir biz atalmysh sharalarǵa qatysty tujyrymdamalar ázirledik. Osy talaptarǵa sáıkes «Altyn sapa» syılyǵy men «Qazaqstannyń úzdik taýary» kórme-konkýrsy ótkiziletin bolady», – dedi.
Semınarǵa óńirdegi shaǵyn jáne orta kásipkerlik sýbektileriniń ókilderi men sarapshylar qatysty. Shara qorytyndysymen qatysýshylarǵa arnaıy sertıfıkattar tabys etildi.
Aıta keteıik, «Altyn sapa» syılyǵy men «Qazaqstannyń úzdik taýary» kórme-konkýrsy qatysýǵa úmitkerler ótinimderin 2015 jylǵy 1 shildege deıin zh.skakova@palata.kz elektrondy meken-jaıyna joldaı alady.
Talǵat Raıymbek.
Derek, sýret: Qyzylorda oblysy kásipkerlik palatasynyń baspasóz qyzmeti.
