QOSTANAI. 17 maýsym. Qostanaıda «Dýslyq» tatar-bashqurt etnomádenı ortalyǵy Sabantýı merekesin atap ótti. Onda Tatarstannyń prezıdenti Rýstam Mınnıhanovtyń qostanaılyq qandastaryn Sabantýı merekesine joldaǵan quttyqtaý sózin Tatarstan Respýblıkasynyń halyq ártisi, baıanıst, ánshi Ramıl Quramshın ákelip oqyp berdi. Bul týraly egemen.kz tilshisi habarlady.
Tatar-bashqurt etnomádenı ortalyǵynyń tóraǵasy Renat Bektemirov: «Sabantýı tatar men bashqurt halyqtarynyń ejelgi merekesiniń biri. Bizdiń atalarymyz Qazaqstanda 200 jyldan artyq turyp keledi. Mysaly HIH ǵasyrdyń aıaǵy men HH ǵasyrdyń basynda Ýfa men Qazannan tatar saýdagerleri Qostanaı dalasyna kelgen. Oblystyq «Dostyq úıi» aǵaıyndy tatar saýdagerleri, kásipkerleri Iаýshevterdiń passajyna ornalasqan. Bul tatar saýdagerleri basqa da mesenattarmen birlesip, osy óńirdegi alǵashqy musylman meshitin salǵan bolatyn. Ol da áli kúnge qostanaılyq musylman jurtyna qyzmet etip keledi, úsh jyldan keıin onyń 125 jyldyǵyn toılaıtyn bolamyz. Al bıyl Qostanaıda tatar-bashqúrt etnomádenı ortalyǵynyń ashylǵanyna 20 jyl tolady. Bul qaýymdastyqtyń bulaq bastaýynda Zákııa Mýhsınova, Tánzıla Hakımovalar turdy. Qazir ekeýi de aramyzda joq. Imandy bolsyn, olar bizdiń júregimizde saqtalady», dedi.
Sabantýı búginde barsha qazaqstandyqtardyń ortaq, halyqtyq merekesine aınaldy. Merekege jınalǵandar tatar, bashqurt tilderinde shyrqalǵan ánderdi tyńdady, bılerdi tamashalady. Al jastar halyqtyq sporttyq jarystardy qyzdyrdy. Qol kúrestirýden,gir kóterý men baǵanaǵa órmeleýden ozyp shyqqanǵa tatar halqynyń dástúrimen qoı syıǵa tartyldy. Merekege jınalǵandardy, ásirese balalardy tatar-bashqurt dastarhany kútip turdy. Olar tatardyń merekelik taǵamdaryn, samaýrynda qaınatylǵan ıisi burqyraǵan sháıin iship máz boldy.
Oblystyq Dostyq úıiniń dırektory Ábdibek Bojaqov: «Sabantýı» qostanaılyqtar úshin tanys, súıikti mereke. Eki halyqtyń dıqandary da egin egip, jınap bolǵannan keıin qýanǵan, ony atap ótken. Mine, bul solaı halyqtyq merekege aınalǵan. Merekeni birge toılaǵan qatar túrki halqynyń dostyǵy da ǵasyrlar boıy birge órilip kelgen», dedi.
Názıra Járimbetova.
Derek, sýret: egemen.kz
