Aqmola oblysynyń basshysy Jánibek Káribjanov, onyń birinshi orynbasary Qýanysh Alpysbekov, qala ákimi Amanjol Bólekbaevpen burynnan jaqsy tanys-bilis, syılas edim. «Jas Alash» gazetiniń bas redaktory kezinde, odan soń on úshinshi shaqyrylǵan Joǵarǵy Keńestiń depýtaty retinde, Aqparat mınıstriniń orynbasary retinde osy tulǵalarmen aralasyp, memlekettik is-sharalarda kezdesip júretinbiz. Aqmolaǵa ushyp kelip, oblys basshysymen kezdesip, «Egemen Qazaqstan» gazetin kóshirý úshin ǵımarat qajet ekenin aıttym. Aqmolada «Egemen Qazaqstan» gazeti menshikti tilshileriniń keńesin ótkizý júzege asyryldy. Áýeli burynǵy Pobeda kóshesindegi turǵyn úı astyndaǵy aýmaǵy jetkilikti mekenjaı usynyldy. Gazet qosynynyń jetekshisi Muratbek Toqtaǵazın Selınograd aýdany ákimshiligi oblysqa kóshirilgeni týraly aqparat aıta qaldy. Qysqasy, Jánibek Káribjanov myrzaǵa qaıta kirip, búgingi «Egemen Qazaqstan» gazeti otyrǵan aýmaqty tutastaı aldyq. Jıyrmadan astam páter, jalǵyzbasty jýrnalıster úshin bes bólmeli jataqhana satyp aldyq.
Gazettegi ekinshi sátti sát – biz Qazaqstan tarıhyn jaza bastadyq. О́ıtkeni bul kezeńde Reseı tarıhshylary tarapynan ara-tura «Qazaqta buryn memleket bolmaǵan» degen pikirler aıtylyp, jazyla bastaǵan edi. Osyndaı zymııan pıǵyldyń jolyna tosqaýyl qoıý úshin tarıhtaǵy ornymyzdy naqtylaı túsý qajet boldy. Ataqty tarıhshylar Mámbet Qoıgeldi, Talas Omarbekov, Kamal Burqanov, Bereket Káribaev, Búrkitbaı Aıaǵan, taǵy da basqa jas tarıhshylar osy jobany júzege asyrýǵa belsene aralasty. Gazet betinde zaman, qoǵam, demokratııalyq úrdister júzege asyryla bastady. Ártúrli oı-pikirler qalyptasa tústi. Oppozısııalyq toptar da qylań bere bastady.
Osy kezeńde ózimniń keńesshim etip qazaqtyń ataqty jazýshysy, Memlekettik syılyqtyń laýreaty Sherhan Murtazany jumysqa shaqyrdym. Oıdy oı, sózdi sóz qýady. Qazaqtyń taǵy bir ataqty pýblısıst jazýshysy Kamal aǵa Smaıylov ekeýiniń arasyndaǵy hatty uıymdastyrý ıdeıasy týyndady. Kamal aǵa bizdiń basylymda «HHI ǵasyr – Qazaqstan ǵasyry» atty taldaý materıalyn jarııalaǵan edi. Oǵan Sherhan aǵamyz jaýap jazdy. Kózi qaraqty oqyrman muny umyta qoımaǵan shyǵar. Ekeýara jazysqan bul hattarda elimizdiń jer asty, jer ústi baılyqtary halyqtyń múddesine emes, basqa bir toptardyń múddesine jumsala bastaǵany ashyq ári ashyp jazyldy. Bul hat jazysý bir jarym jylǵa sozyldy. Keıin eki jazýshynyń qalamynan týǵan osy dúnıeniń bári «Halqym, saǵan aıtam, Elbasy, sen de tyńda» degen atpen kitap bolyp jaryqqa shyqty.
Men gazetke redaktor bolǵan kezde el ómirinde oryn alǵan eleýli oqıǵanyń biri – astananyń Almatydan Aqmolaǵa aýysýy. Sol jyly Prezıdentpen birge Aýstralııanyń birneshe qalasyn araladyq. Kanberra qalasynda bolǵanda Prezıdent bizde de osy shahar sııaqty jańa astana bolatynyn aıtyp, Aqmolaǵa kóshti bastaý týraly tuńǵysh ret pármen berdi. Maǵan osy pármendi «Egemen Qazaqstan» gazetiniń minberinen halyqqa alǵashqy bolyp jetkizý baqyty buıyrǵanyn da aıta ketkim keledi.
Jalpy, joǵaryda aıtqan hat jazysýlar meniń taǵdyryma da áser etti. Sol úshin jumystan shettetildim. Biraq oǵan esh ókinbeımin. О́ıtkeni gazettiń ult aldyndaǵy mıssııasyn oryndaýǵa óz úlesimdi bir adamdaı qostym dep oılaımyn.
Qazir «Egemen Qazaqstan» gazeti Ádiletti Qazaqstannyń jańa tarıhynyń jylnamasyn qalyptastyratynyna senimim mol. Gazet ujymy men oqyrmandaryn basylymnyń 105 jyldyq mereıtoıymen shyn júrekten quttyqtaımyn. Jasaı ber, «Egemen!».
Ýálıhan QALIJAN,
UǴA akademıgi, «Egemen Qazaqstan» gazetiniń 1996–1998 jyldardaǵy bas redaktory
