Chempıonattyń sońǵy kúni kóńilsizdeý bastaldy. 48 kg salmaq dárejesindegi Sanjar Táshkenbaı Shodıerjon Melıkýzıevpen qolǵap túıistirdi. Buǵan deıin qandasymyz dál osy ózbek boksshysyn túrli jaýapty jarystarda eki ret jeńgen. Biraq bul joly biz kútkendeı bolmady. Qos óren aıanbaı aıqasty. Báseke barysynda ekeýiniń de shekesi jarylyp, dárigerlerdiń kómegine júgindi. Úshinshi raýndta Táshkenbaı nokdaýnǵa tústi. Tóreshiler sony esepke ala otyryp, Melıkýzıevti jeńimpaz dep tanydy.
Kóp keshikpeı taǵy bir álem chempıonymyz sharshy alańǵa shyqty. 54 kg salmaqtaǵy Mahmud Sabyrhan jastardyń álem birinshiliginiń jeńimpazy, eresekterdiń qurlyq chempıonatynyń qola júldegeri Shahzod Muzaffarovpen kúsh synasty.
Báseke bastalǵan bette tizgindi qolyna alǵan Oralbek Ilııasovtyń shákirti ýaqyt ótken saıyn qarqynyn kúsheıte tústi. Muzafarov barynsha qarsylyq kórsetkenimen, Mahmudyń sheberlik deńgeıi odan bir bas joǵary ekeni anyq ańǵaryldy. Jeńis qazaq boksshysynyń enshisine jazyldy.
Odan keıin Qazaqstan men О́zbekstannyń jýan judyryqty jigitteri arasyndaǵy tórt jekpe-jektiń barlyǵy da «ózbek aǵaıyndardyń» paıdasyna sheshildi. Osy kúnge deıin kórshi eldiń ókilderin únemi sabap kelgen Orazbek Asylqulov (57 kg) sheshýshi tusta ataqty Mırazızbek Mırzahalılovqa laıyqty qarsylyq kórsetti. Birinshi raýndta qandasymyz basym boldy. Biraq qalǵan eki kezeńde álem, qurlyq chempıony, Azııa oıyndarynyń jeńimpazy soqqylaryn dálirek jumsap, jeńisti Orazbektiń ýysynan julyp áketti.
Dýlat Bekbaýov (67 kg) pen Mýjıbıllo Tursynovtyń kezdesýi de keskilesken aıqaspen ótti. Sheberler sheginbeı aıqasty. Qazylar biraz oılana-tolǵana kele jeńisti Tursynovqa berdi. Bul sheshimge narazy bolǵan Dýlat marapattaý rásimine shyǵyp, kúmis medaldi moınyna ilýden bas tartty.
Abylaıhan Júsipov (71 kg) pen Havasbek Asadýllaev arasyndaǵy saıysta da dál sondaı jaǵdaı oryn aldy. Teń dárejede ótken básekede tóreshiler ózbektiń yǵyna jyǵyldy.
Chıangmaıda ózin jaqsy qyrynan kórsetken Dıas Moljigitov (75 kg) sheshýshi tusta Djavohır Ýmmatalıevtiń osal tusyn taba almady.
86 kg salmaq dárejesinde judyryqtasqan álem chempıony Bekzat Nurdáýletov jastar arasyndaǵy Azııa birinshiliginiń jeńimpazy (U-22) Jasýrbek Iýldoshevty jeńdi. Sóıtip, atalǵan jarystyń buǵan deıingi mejelerinde qazaq pen ózbek boksshylary arasynda teń esep (2:2) tirkelse, fınalda eki jerlesimiz ǵana jeńiske jetip, qalǵan beseýi jeńilistiń kermek dámin tatty.
92 kg salmaqtaǵy Saǵyndyq Toǵambaı tájistandyq Parvız Kárimovtyń tas-talqanyn shyǵardy. Myrzaǵalı Aıtjanovtyń shákirti ony úsh ret nokdaýnǵa jibergennen keıin báseke dereý toqtatyldy.
Asa aýyr salmaqta aıqasqan Aıbek Oralbaı komanda kapıtanyna tán minez kórsetip, qytaılyq Ábýdýreshıtı Remýladan basym tústi.
Osylaısha, Taılandta ótken Azııa chempıonatynda elimizdiń ánurany tórt márte shyrqaldy. Bul jarystyń bas júldesi men kúmis medali kimderge buıyrǵanyn joǵaryda aıttyq. Jartylaı fınalda súringen Erasyl Jaqpekov (80 kg) qolany qanaǵat tutty. Sáken Bıbosynov (51 kg), Beıbarys Jeksen (60 kg), Muhamedsabyr Bazarbaıuly (63,5 kg) jeńis tuǵyryna kóterile almaı, elge eńseleri túsip oraldy.
Komandalyq esepte bizdiń jigitter ekinshi oryn aldy. Al qorjynynda 8 altyn, 2 kúmis, 1 qolasy bar О́zbekstan jeke-dara kósh bastasa, úzdik úshtikti Tájikstan (1+1+3) túıindedi.
Jarys aıaqtalǵan bette BAQ ókilderine suhbat bergen ulttyq quramanyń bas bapkeri Qaırat Sátjanov: «Biz 67, 71 kg salmaq dárejelerinde ótken fınaldyq saıystarynyń nátıjelerimen kelispeımiz. Bul jerde tóreshiler tarapynan aǵattyq ketti. Qalǵan jekpe-jekterde durys sheshim shyǵaryldy. Shákirtterimniń jibergen qatelikteriniń barlyǵyn kórdim. Endi sol olqylyqtardyń ornyn toltyrý baǵytynda eńbek etemiz. Aldaǵy ýaqytta fızıka men tehnıkaǵa kóbirek mán berýdi kózdep otyrmyz. Osy oraıda, Nurbek Oralbaı bastaǵan myqty boksshylarymyzdyń birazy osy jarysqa qatyspaǵanyn da eskergen jón. Eń bastysy, bizde jaqsy rezerv bar. Daryndy jastardy ulttyq quramaǵa tartamyz», dep oı túıdi.
