Premer-mınıstr Oljas Bektenov Qytaı Halyq Respýblıkasynyń Qazaqstandaǵy Tótenshe jáne ókiletti elshisi Chjan Sıaomen ekijaqty saýda-ekonomıkalyq jáne mádenı-gýmanıtarlyq yntymaqtastyqty arttyrý jónindegi birlesken jumys nátıjelerin talqylady.
Kezdesý Chjan Sıaonyń Qazaqstandaǵy QHR elshisi retindegi dıplomatııalyq mıssııasynyń aıaqtalýyna oraılastyrylyp otyr.
Oljas Bektenov eki memleket basshylarynyń alǵa qoıǵan mindetterine qol jetkizýdegi syndarly jumystardy atap ótti. Keıingi jyldary ekijaqty ekonomıkalyq baılanystardy nyǵaıtýda aıtarlyqtaı jetistikterge qol jetkizildi. Qarym-qatynastardy yntymaqtastyqtyń jańa deńgeıine kóterý taýar aınalymyn arttyrýǵa, eksportty keńeıtýge jáne ınvestısııa tartýǵa yqpal etedi. Qytaı Qazaqstannyń iri saýda seriktesi bolyp qala beredi. Transkaspıı mýltımodaldy dálizi boıynsha tasymaldanatyn júk aǵynyn arttyrý yntymaqtastyq áleýetin ashýdyń keleshegi zor quraly bolmaq.
О́z kezeginde Chjan Sıao jyl basynan beri elder arasyndaǵy taýar aınalymy 12%-ǵa ósip, 36,5 mlrd dollardy quraǵanyn habarlady. Sondaı-aq Qytaı elshisi el naryǵyna iri qytaı ınvestorlarynyń qyzyǵýshylyǵy artyp otyrǵanyn aıtty, bul qolaıly bıznes-klımatty kórsetedi.
Áńgimelesý qorytyndysy boıynsha taraptar jan-jaqty saýda-ekonomıkalyq áriptestikti odan ári nyǵaıtýdyń mańyzdylyǵyn atap ótti.
