Foto: freepik.com
Bul týraly Ortalyq kommýnıkasııalar qyzmetinde ótken baspasóz máslıhatynda QR О́KM Geologııa komıtetiniń tóraǵasy Erlan Aqbarov málimdedi.
«Geologııa salasyn avtomattandyrý maqsatynda jer qoınaýyn paıdalanýdyń biryńǵaı platformasyn qurý boıynsha jumystar júrgizilip jatyr. Sonymen qatar, Fınlıandııa geoportalynyń modeli negizge alyndy. Interaktıvti karta ázirlendi, 66 myńnan astam geologııalyq esepter ornalastyryldy jáne jer qoınaýyn paıdalanýshylardyń eseptiligin elektrondy túrde berý fýnksııasy avtomattandyryldy», dedi komıtet tóraǵasy.
Erlan Aqbarov málim etkendeı, Qazaqstannyń geologııalyq salasyn damytý tujyrymdamasy aıasynda jer qoınaýyn memlekettik geologııalyq zertteýdiń tıimdiligin arttyrý, onyń ishinde jer qoınaýyn zertteý tásilderin qaıta qaraý sharalary júzege asyrylyp jatyr. Árbir aýdan úshin aldymen anomalııalardy anyqtaý úshin spektrlik taldaý ádisterin qoldana otyryp, jerdi qashyqtyqtan zondtaýdy júrgizý usynylady. Kelesi kezeńde anyqtalǵan perspektıvalardy sapaly rastaý úshin synamalardy irikteý jáne zerthanalyq taldaý arqyly jerústi barlaý jumystaryn júrgizý usynylady. Bul rette jer qoınaýyn zerdeleýdiń árbir kezeńiniń nátıjeleri boıynsha memleket shyǵyndaryn eskere otyryp, qol qoıý bonýsynyń bastapqy mólsherin belgileı otyryp, aýksıon ótkizý usynylady.
Spıker 2018 jyldan 2024 jylǵa deıingi kezeńde jer qoınaýyn paıdalanýshylarǵa Geologııalyq túsirý jáne geofızıkalyq jumystardy júrgizý maqsatynda jer qoınaýyn geologııalyq zertteýge 302 lısenzııa berilgenin atap ótti. Zertteýge jumsalǵan shyǵyndardyń jalpy quny 32 mlrd teńgeden asty. Qazirgi ýaqytta jer qoınaýyn geologııalyq zertteýge lısenzııa berý prosesi elektrondyq formatta júzege asyrylyp jatyr.
Sondaı-aq Erlan Aqbarov geologııalyq derekterdi sıfrlandyrý aıasynda jasandy ıntellekt pen aqparatty óńdeýdiń ınnovasııalyq ádisterin qoldaný josparlanyp otyrǵanyn atap ótti.
