Elý jyldan beri Kúrshim, Marqakól halqyn áýre-sarsańǵa túsirgen ótkel máselesi bir-aq sátte sheshiledi degenge sený óte qıyn edi. Sebebi osy ýaqytqa deıin bul máseleni jýrnalıster de, Parlament depýtattary da san márte kótergen. Biraq nátıje bolmaǵan. «Egemenge» shyqqan maqala eleń etkizdi. Shyndyǵynda, Buqtyrma sý qoımasy salynǵannan soń Kúrshim men Marqakól óńirleri aralda qalǵandaı kúı keshken. Sebebi tóte jolǵa sý kóterilip, jolaýshylar arǵy jaǵadan parom arqyly ótýge májbúr bolǵan.
Áýelde qol parom iske qosylypty. Úlken paromdar bertinde eki jaǵany jalǵaǵan. Onyń ózinde birde synyp, birde turyp, jolaýshylardyń narazylyǵyn týdyrar edi. Kóktem men kúzdiń kúni qos aýdannyń turǵyndary Úlken Naryn nemese Zaısan arqyly qatynaýǵa májbúr bolǵan. Nege deseńiz, muz qabyrshyqtana qata bastaǵanda paromnyń jyljýy da qıyn edi. Al muz betimen júrý qaýipti. Táýekelge bel býǵan júrgizýshilerdiń qanshamasy muz jarylyp, sý túbine ketti? Aldyńǵy jyldyń ózinde bir traktor, bir jeńil kólik muz astyna ketip, keıýana ajal qushqan. Mundaı mysaldy myńdap bolmasa da, júzdep keltirýge bolady. Qaıbir jyldary Kúrshim aýylynda úılený toıy bolyp, paromnyń júrmeı qalýyna baılanysty eki jas bergi jaǵada qalǵany bar. Sóıtip, úılený toıy eki jassyz ótipti.
Kópir qos aýdannyń qaı zamannan bergi armany edi. Aýdan turǵyndarynyń qatynaýyna ǵana emes, ekonomıkalyq, strategııalyq mańyzdy nysan bolady desken el. Aıtqandaı, az ýaqyttyń ishinde el ańsaǵan nysannyń qazyǵy qaǵylyp, qurylys qarqyn alǵan. Tıisti qarajat da úzdiksiz bólinip otyrdy. Qurylys bir mınýt ta damyldaǵan joq. Aldymen tehnıkalyq kópir tústi, artynsha qaz-qatar kópirdiń tireýi quıyldy. Jumystyń eń qıyny da sol bolsa kerek. Sý astyna temir qubyr barynsha qaǵylyp, oǵan beton quıylǵan. Betonnyń beriktigin О́skemendegi D.Serikbaev atyndaǵy ýnıversıtettiń ǵalymdary qadaǵalap otyrǵan. Osy oraıda aıta keterligi, bir shaqyrymnan asatyn uzyn kópirdiń qurylysyna birde-bir sheteldiń mamany tartylǵan joq. Byltyr dál osy ýaqytta tehnıkalyq kópir túıisip, onyń ózine qýanǵan el. Sonyń ózinde kópirdiń merziminde aıaqtalady degen ýádeli sózge jurt kúmánmen qaraǵan. Alaıda qos aýdandy ǵana emes, bes birdeı aýdanǵa jol ashqan Kúrshim kópiri qazan aıynda ashylyp, Shyǵys bolyp toılady. Kópirdiń kireberisine birqatar aýdan kıiz úı tigip, qazan kótergen.
Respýblıka kúnimen tuspa-tus kelgen qýanysh óte joǵary deńgeıde toılandy. Aqtarylyp aq tilekter aıtyldy. Kúrshim kópiriniń salynýyna úles qosqan azamattar marapattaldy. Alǵysqa bólengenderdiń qatarynda «Elý jyl burynǵy eski parom eldi qashanǵy áýrege túsiredi?» atty maqalanyń avtory, sol kezdegi «Egemen Qazaqstan» gazetiniń menshikti tilshisi Azamat Qasym da bar edi. Azamattyń aıtýynsha, kúrdeli ári kúrmeýli máseleniń sheshilýi – «Egemenniń» abyroıy. Ras, áıtpese buǵan deıin qanshama BAQ ókilderi shyryldap turyp, Kúrshim ótkelindegi problemany jazdy, aıtty. Bedeldi depýtattar da úkimettiń tabaldyryǵyn tozdyrdy. Sóıtip, «Egemenge» shyqqan shaǵyn ǵana maqala elý jyldan bergi eldiń armanyn oryndady. «Gazet halyqtyń kózi, tili, hám qulaǵy» degen Alash arysy Ahmet Baıtursynulynyń sózi oıǵa oralǵan. Gazetke túsken ár sóz – tasqa qashalǵan tarıh.
Kógedaı ShÁMERHAN,
aqyn
Shyǵys Qazaqstan oblysy
