Batys Qazaqstan joldarynyń 27,8 paıyzy ǵana qaýipsiz

ORAL. 17 maýsym. Batys Qazaqstan oblysynda jol-kólik oqıǵasy kóbeıip barady. Munyń basty sebebiniń biri – oı-shuńqyry kóp joldar bolyp otyr. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady. Atalǵan departamenttiń ákimshilik polısııa basqarmasy bastyǵynyń orynbasary Sáken Haırýllınniń aıtýynsha, kólik apatynyń kóbeıýine taǵy bir sebep – óńirdegi avtomobılder sanynyń ósýi. Onyń sany 2010 jyldan beri 47,1 paıyzǵa kóterilgen. Al 2015 jyldyń bes aıynda 8,9 myń avtomobıl esepke qoıylǵan. Sondaı-aq, Oral arqyly ótetin tranzıttik kólik tasqyny da ulǵaıǵan. Aldaǵy ýaqytta 1 mln. 100 myń avtokólik Oral joldary ústimen ótedi dep kútilýde. Baqylaý men tekserý nátıjeleri boıynsha, oblystyq mańyzy bar joldardyń 27,8 paıyzy ǵana belgilengen qaýipsizdik normalaryna sáıkes ekendigi anyqtaldy. Kóp jerlerde qosymsha jol belgileri, arnaıy jolaqtar jáne baǵdarshamdar qoıylmaǵan. Soǵan baılanysty jol-kólik erejelerin buzýshylardyń sany da artýda. Odan bólek, alkogoldik ishimdik iship kólik júrgizetinderdiń sany 3,6 paıyzǵa kóbirek ustalǵan. Bul rette jol-kólik oqıǵasy saldarynan qaza tapqandar sanynyń 8 paıyzǵa qysqarǵany ǵana kóńilge medeý. Temir Qusaıyn. Derek: egemen.kz. Sýret: aif.ru.