Bul ózgeris «Býrabaı» ulttyq parkiniń bıosferasyn saqtaý, týrısterge barynsha qolaıly ahýal jasaý úshin qolǵa alynyp otyr. Sonymen qatar, Ulttyq park aýmaǵynda jáne oǵan irgeles ornalasqan jerlerde turatyn eldi-mekenderdiń halqyna tıimdi bolý jaǵy da da eskerilgenin atap ótken jón.
«Býrabaı» MUTP dırektorynyń orynbasary Venera Nuǵmanova:
«Buryn Ulttyq parkterge kelgeni úshin alynatyn tólemaqy respýblıkalyq bıýdjetke tússe, Salyq kodeksine ózgeris enýine baılanysty endi ol qarajat Ulttyq parkterdiń esebinde bolady. Býrabaı – elimizdegi halyq eń kóp keletin Ulttyq park. Bıyl kelgen týrıster sany 1 mıllıonnan asty, jyl sanap bul kórsetkish ósip kele jatyr. Árıne, týrıster kóp bolǵan saıyn jergilikti tabıǵatqa da úlken salmaq túsedi. Qoqys kóbeıedi, topyraq erozııaǵa ushyraıdy, taý-tastar búlinedi. О́rt qaýpi kúsheıedi. Jumys kúshin kóbeıtýge týra keledi. Onyń barlyǵy qosymsha shyǵyndy qajet etedi», deıdi.
Qazirgi tańda «Býrabaı» parkine kiretin tustarda avtomattandyrylǵan 5 ótkizý-baqylaý beketi jumys istep tur. Tólemdi Kaspi jáne Halyk Bank QR-kodtary arqyly jasaýǵa bolady. Sonymen qatar tólem termınaldary ornalastyrylyp jatyr.
- «Býrabaı» ulttyq parkiniń aýmaǵynda turatyn, sondaı-aq ulttyq parkpen irgeles eldi-mekenderdiń 26,5 myń halqyna ótý tegin. Eshqandaı tólemaqy alynbaıdy. Iаǵnı, jergilikti halyqtyń múddesi eskerildi. Týrısterdiń kelgeni jaqsy, árıne. Biraq osy jerde ómir súrip jatqan adamdardyń jaǵdaıyn oılaý kerek, - deıdi Venera Nuǵmanova.
Spıker atap ótkendeı, «Býrabaıda» ekojúıeni qorǵaýǵa baǵyttalǵan arnaıy tabıǵat qorǵaý rejımi bar. Ormandy órtten qorǵaý, jańa kóshet otyrǵyzý, ań-qustar men balyqtardy qorǵaý, olarǵa qysqy azyq-túlik ázirleý, qorshaǵan ortaǵa monıtorıng júrgizý, bıoqaldyqtardy tazalaý sııaqty jumystar jyl boıy júredi. 2017 jyly engizilgen tarıf 7 jyldan beri alǵash ret ógertilip otyrǵanyn aıta ketken jón.
