Eki apta boıy ǵylymı-redaksııalyq alqa Qazaqstan tarıhy akademııalyq basylymy aıasyndaǵy jeti tomnyń bastapqy qoljazbasyn oqyp shyǵyp, ǵylymı saraptama jasady.
Bul iske kóptomdyq avtorlary men jetekshileri, sondaı-aq Ǵylym jáne joǵary bilim mınıstrliginiń basshylyǵy, elimizdiń ǵylymı-zertteý ınstıtýttarynyń, memlekettik arhıvtiń ókilderi men qyzmetkerleri, tarıhshy ǵalymdar men sarapshylar atsalysty.
Kóshpeli otyrysty qorytyndylaı kele, Memlekettik keńesshi eki aptaǵa sozylǵan birlesken jumystyń nátıjesinde Qazaqstan ǵylymı qaýymdastyǵynyń ókilderi basylymnyń qurylymyna jáne kóptomdyq qoljazbasynyń mazmunyna qatysty usynystar bergenin aıtty.
Erlan Qarın aldaǵy ýaqytta ǵylymı-redaksııalyq alqa usynystardy qarap, olardy muqııat taldaý jáne qoljazbany redaksııalaý boıynsha aýqymdy jumys júrgizetinine nazar aýdardy. Sondaı-aq redaksııalyq alqa jan-jaqty ǵylymı ustanymǵa basa mán berýi kerek ekenin atap ótti. Memlekettik keńesshiniń aıtýynsha, akademııalyq kóptomdyqty merzimine qaramastan sapaly etip shyǵarý óte mańyzdy.
«Qazaqstan tarıhy: ejelgi dáýirden búginge deıin» atty jańa akademııalyq kóptomdyq ǵylymı qaýymdastyqtyń ujymdyq eńbegi sanalady. Kóptomdyqty ázirleý jumysyna elimizdiń tarıhshylary men arheologterinen bólek, etnologteri, muraǵat, murajaı qyzmetkerleri, geograftar, lıngvıster, sarapshylar jáne basqa da mamandar jumyldyryldy.
Kóptomdyqty ázirleýge qatysty aldaǵy ýaqytta atqarylatyn jumys aıasynda ǵylymı forýmdar, konferensııalar ótkizilip, arnaıy seksııalar, dóńgelek ústelder men ádistemelik semınarlar uıymdastyrylady. Onda zertteýlerdiń ǵylymı nátıjeleri, otandyq ǵalymdar men sarapshylardyń, basqa da mamandardyń usynystary qarastyrylady.
