Bıyl kóktemdegi sý tasqynynan qatty zardap shekken óńirlerdiń biri – Aqtóbe oblysy. О́ńir basshysynyń aıtýynsha, tabıǵat apatynyń saldarynan úı-kúısiz qalǵan turǵyndardyń barlyǵy búginde baspanamen qamtylǵan. Sý tasqynynan bir ǵana Yrǵyz aýdanynda Nura, Jaısańbaı, Belsher, Quıylys, Mamyr aýyldarynda 170-ke jýyq turǵyn úı zardap shekken. Nura aýyly turǵyndarynyń ótinishimen jańa úıler aýyldan on eki shaqyrym qashyqta ornalasqan Saryoba jerinde salynǵan. Jalpy, oblysta tasqyn sý 4 myńnan astam úıge zalal keltirip, áleýmettik nysandardy da shaıyp ketken. Tehnıkalyq tekserý qorytyndylarynda 1 013 úı apatty dep tanylǵan. Iri bıznes ókilderiniń qarajaty esebinen jalpy somasy 25 mlrd teńgege 500 úı salynyp, 513 daıyn úı satyp alynǵan. Sondaı-aq 3 myń turǵyn úıdi jóndeýge, qalpyna keltirýge 9,8 mlrd teńge ótemaqy berilgen.
– Bul qıyn kezeńdi Úkimet pen halyqtyń birlesken kúsh-jigeriniń arqasynda ǵana eńserdik. Turǵyn úılerden bólek, memleket tarapynan búgingi tańda 13 bilim berý, 2 sport, 1 densaýlyq saqtaý nysandaryn jóndeýge, qurylysyn júrgizýge, sondaı-aq 47 shaqyrym avtojoldy, 23 kópirdi, 22 gıdrotehnıkalyq qurylysty qalpyna keltirýge tolyq qarjy bólindi, – dedi oblys basshysy.
Sonymen birge sý tasqyny saldarynan zardap shekken 63 shaǵyn jáne orta bıznes ókiline, qıraǵan 80 mal kesheni men malshy úılerine, 493 sharýashylyqqa qarasty 11 myńnan astam mal basyna ótemaqy tóleýge tolyq kómek kórsetildi.
Bıyl óńirde 8 jańa mektep paıdalanýǵa berildi. Jyl sońyna deıin óńirde taǵy 2 mekteptiń qurylysy aıaqtalmaq.
– Aldaǵy jyldary 11,4 myń oqýshyǵa arnalǵan 14 jaıly mektep qurylysyn aıaqtap, iske qosamyz. Buǵan qosa shalǵaı aýyldarda jergilikti bıýdjet, basqa qarjy kózderinen 4,6 myń oryndyq 15 mektep salynady, – dedi A.Shaharov.
«Aýyldyq densaýlyq saqtaýdy jańǵyrtý» ulttyq jobasy aıasynda óńirde 29 joba qolǵa alynǵan. Búginde 12 nysan paıdalanýǵa berildi. О́ńir basshysy jyl sońyna deıin taǵy 6 nysan iske qosylatynyn aıtty.
Budan basqa, jeke ınvestısııalar esebinen Batys Qazaqstan óńirlerin tolyǵymen qamtıtyn iri joba – ıadrolyq medısına ortalyǵy bar «Orhun Med Limited» klınıkasynyń qurylysy bastaldy. Nysan 2026 jyly paıdalanýǵa beriledi.
A.Shaharovtyń aıtýynsha, óńirde jaqyn arada ınvestısııa kólemi 21,4 mlrd teńgeni quraıtyn rels dánekerleý zaýyty («PZTM LTD» JShS), ınvestısııa kólemi 99,6 mlrd teńge bolatyn bıtým zaýyty («Batys Bıtým» JShS), 70 mlrd teńge somasynda qarjylandyrylatyn sement zaýyty («Aqtobe Cem» JShS), basqa da mańyzdy jobalar iske asyrylady. Bul jobalar júzege assa, óńirde jańa jumys oryndary ashylyp, salyq túsimi artady, sondaı-aq oblystyń ónerkásiptik áleýeti damyp, ekonomıkalyq negizi nyǵaıady.
Qazir Álııa Moldaǵulova atyndaǵy halyqaralyq áýejaıǵa ınvestorlar tartý, jalpy aýdany 858 gektar arnaıy ekonomıkalyq aımaq (AEA) qurý jumystary júrgizilip jatyr. Sondaı-aq Hromtaý monoqalasynda quny 400 mıllıard teńgeni quraıtyn 20 joba júzege asatyn ındýstrıaldy aımaq qurý jumysy bastaldy.
Oblystyń aýyl sharýashylyǵy salasyn qoldaýǵa 15,5 mlrd teńge bólingen. Kórsetilgen memlekettik qoldaýdyń nátıjesinde, osy jyldyń 11 aıynda 333 mıllıard teńgeniń ónimi óndirilgen. Sonymen qatar «Aýyl amanaty» baǵdarlamasy aıasynda 2900-den astam joba maquldanyp, 2706 jobaǵa 15 mlrd teńge nesıe berilgen.
Aqtóbe oblysynyń 2025 jylǵa arnalǵan josparyna toqtalǵan ákim keler jyly óńirdiń ekonomıkalyq ósimi keminde 103% deńgeıinde bolady dep málimdedi.
– Bul rette ónerkásip salasynda 2 trln teńge ónim óndiremiz. Sondaı-aq oblysqa 1 trln teńgege jýyq ınvestısııa tartyp, 1 myńnan astam jumys orny qurylady. О́ńirdiń tranzıttik áleýetin odan ári damytý maqsatynda «Qandyaǵash – Embi – Shalqar – Yrǵyz» respýblıkalyq avtojoly qurylysynyń 110 shaqyrymy aıaqtalady. Normatıvtik jaǵdaıdaǵy avtojoldardyń úlesi 80% bolady. Atalǵan kórsetkishke jetý maqsatynda aldaǵy jyly 46 jobany iske asyrý kózdelip otyr, – dedi A.Shaharov.
Sondaı-aq respýblıkalyq «Aqtóbe – Qarabutaq –Ulǵaısyn» avtojolynyń 6 ýchaskesin qaıta jańartý josparlanǵan. Oblys ákiminiń aıtýynsha, keler jyly 5,5 myńnan astam halqy bar 11 aýylǵa aýyzsý júrgiziledi. Sóıtip óńirde taza aýyzsýmen jabdyqtaý máselesi tolyqtaı sheshiledi. Sondaı-aq 9,8 myń halyq qonystanǵan 24 aýyl gazben qamtylmaq.
– Budan ózge, 2025 jyly 975,0 myń sharshy metr turǵyn úıdi paıdalanýǵa berýdi josparlap otyrmyz. «Aqtóbe jastary» baǵdarlamasymen 70 jas otbasy baspanaly bolady. Aldaǵy jyly 27 aýyldy ınternetpen jabdyqtap, qamtý deńgeıin 98,8%-ǵa deıin jetkizemiz. Sondaı-aq respýblıkalyq mańyzy bar joldardyń 340 shaqyrymynda mobıldi baılanyspen qamtıtyn 17 munara ornatamyz, – dedi óńir basshysy.
Qazir óńirdiń áleýmettik-ekonomıkalyq damýy, qoǵamdyq-saıası ahýaly turaqty. Barlyq ózekti másele oblys ákiminiń jeke baqylaýynda. Aımaq basshysy baıandamadan soń BAQ ókilderiniń suraqtaryna jaýap berdi.
