Ustaz da qarap qalǵan joq. Polısııaǵa shaǵymdanyp, shákirtiniń áreketine qatysty aryz túsirdi. Endi balanyń ata-anasy ol úshin sotta jaýap berýi tıis.
- Pedagog oqýshylardyń biri mektep ishinde oǵan ádepsiz sóz aıtqanyn kórsetip, polısııaǵa shaǵymdandy. Jetkinshektiń áreketinde ákimshilik quqyq buzýshylyq sıpattary bar. Bul usaq buzaqylyq bolyp sanalady, – dep habarlady Pavlodar oblystyq polısııa departamentiniń baspasóz qyzmeti.
Tártip saqshylary tıisti tekserý jumystaryn júrgizgen soń kámelettik jasqa tolmaǵan oqýshynyń ata-anasyn jaýapqa tartty. Materıaldar sotqa joldandy.
Taıaýda Pavlodar oblysynda taǵy bir oqýshynyń beıádep áreketi áleýmettik jelilerde taraǵan edi. Ol sabaq ústinde oryndyqqa shyǵyp, aıqaılap, trend túsirmek boldy. Mundaı áreketi úshin fızıka pániniń muǵalimi shákirtke qol jumsady. Bul sát te beınejazbada kórsetilip, kópshiliktiń talqysyna tústi. Saldarynan er adam mektepten qýylyp, oǵan qatysty qylmystyq is qozǵalǵan bolatyn.
Bul jaǵdaıǵa qatysty jeli qoldanýshylarynyń pikiri ekige jaryldy. Biri ustazdyń mundaı áreketi durys emes ekenin alǵa tartsa, endi biri muǵalimge syılastyq tanytpaı, sabaq ótkizýine bógit jasaǵan oqýshy men ata-anasyn jaýapqa tartý kerek degen pikirin bildirdi.
Jalpy, bıyl Pavlodar oblysynda usaq buzaqylyq jasaǵany úshin 1268 adam jaýapqa tartyldy. Onyń ishinde kámelettik jasqa tolmaǵan 51 bala bar.
