Foto: QR TJM
Qazirgi tańda Atyraý oblysynda sý tasqynynyń aldyn alýǵa daıyndyq qalaı júrip jatyr? Bul másele Premer-mınıstrdiń orynbasary Qanat Bozymbaevtyń munaıly óńirge saparynda talqyǵa tústi. Ol aldymen Jylyoı, Mahambet aýdandaryna baryp, eldi mekenderdi sý tasqynynan qorǵaý maqsatyndaǵy jumystarǵa baqylaý júrgizdi.
Jylyoı aýdanynyń ortalyǵy – Qulsary qalasynyń mańyndaǵy Qamyskól kóliniń jaǵalaýy nyǵaıtylyp jatyr. Osyndaǵy Jem ózeni arnasynyń 23 shaqyrymy jáne Qursaı kanalynda 35 shaqyrym tereńdetilgen. Bul jumystarǵa 100-den asa tehnıka tartylǵan.
Úkimet basshysynyń orynbasary Qanat Bozymbaev Qulsary qalasynda turǵyndarmen kezdesip, memleket tarapynan turǵyndardy qoldaý sharalarynyń mańyzy týraly aıtyp berdi. Bıyl kóktemdegi sý tasqynynan zardap shekkenderge salynǵan turǵyn úıdiń sapasyna nazar aýdardy.
Al Mahambet aýdanynda Jaıyq ózeniniń boıyndaǵy jaǵalaýdy nyǵaıtý jumysy qolǵa alynǵan. Batyr atyndaǵy aýdannyń ortalyǵy – Mahambet aýylynda 4,5 shaqyrymǵa sozylǵan jaǵalaý nyǵaıtylǵan. Mahambet pen Sarytoǵaı aýyldary aralyǵyndaǵy kópir qurylysy aıaqtaldy. Turǵyndar aýyl ishindegi joldyń jóndelip jatqanyn kórip otyr.
Atyraý qalasynyń mańyndaǵy Talǵaıran, Aqjar jáne Erkinqala aýyldarynda da Jaıyq ózeniniń jaǵalaýynda qorǵanys bógeti salynyp jatyr. Al Almaly aýylynyń tusynda Saryózek kanalynyń boıyndaǵy 5,6 shaqyrym bóget nyǵaıtylyp, Jaıyq ózeniniń jaǵalaýynda uzyndyǵy 2,5 shaqyrym jańa bekitkish ornatý júrgizilip jatyr.
Oblys ákimi Serik Shápkenovtiń aıtýynsha, Gogol kanalynyń arnasyn tazartý, sý aǵynyn ulǵaıtý úshin keńeıtý jalǵasyn taýyp otyr. О́ıtkeni bul – tasqyn sýdyń Kaspıı teńizine quıylýyna jol ashatyn negizgi kanaldyń biri. Onyń uzyndyǵy – 30 shaqyrym, eni – 18 metr, al tereńdigi – 2 metr. Qazir kanaldyń 9,5 shaqyrymynda tereńdetý jumysy atqarylǵan. Sondaı-aq kóktemnen beri Jaıyq ózeniniń Kaspıı teńizine saǵasyn tereńdetý jumystary júrgizilip jatyr. Josparlanǵan jumystyń jalpy uzyndyǵy 10 shaqyrym bolsa, osy kezge deıin 9,5 shaqyrymy tereńdetilgen.
Q.Bozymbaevtyń aıtýynsha, Memleket basshysynyń tapsyrmasymen sý tasqynyn boljaý men modeldeýdiń jańa júıesi – «Tasqyn» jobasy ázirlengen. Bul jobany jyl sońyna deıin iske qosý kózdelip otyr.
– «Qazgıdromet» RMK-nyń mamandary qys maýsymynyń jyly bolatynyna boljam jasady. Biraq qar kóp bolýy múmkin. Sol sebepten barlyq qajetti is-shara aldyn ala jasalýy kerek. Bolýy yqtımal ssenarııdiń bárin eskerýimiz qajet. Osy oraıda daıyndyq jumystarynyń qarqynyn arttyrǵan jón. Ásirese merdiger mekemelerdiń eki aýysymmen jumys isteýin uıymdastyryp, qosymsha adam kúshi men tehnıkalardy tartý qajet. Tótenshe jaǵdaılar mınıstrligi barlyq óńirdegi sý tasqynyna qarsy is-sharalardy baqylaýǵa alady. Atqarylǵan jumystarǵa, daıyndyqqa udaıy monıtorıng júrgizedi, – dedi Q.Bozymbaev.
Atyraý oblysy
