Tıisti jumystar júrgizýdi tapsyrdy

Qytaılyq kópsalaly Dalian Hesheng Holdings kompanııasy bıdaıdy óńdeý jáne ashytý salasyndaǵy tehnologııalyq patenttiń ıegeri sanalady jáne ozyq sıfrlyq tehnologııalardy paıdalanady. Aqmola oblysynda bıdaıdy tereń­dete óńdeý boıynsha tiginen kiriktiril­gen ónerkásiptik park qurylysynyń jańa ınvestısııalyq jobasyn iske asyrý jos­parlanyp otyr. Birinshi kezeńde ınves­tısııa kólemi 500-800 mln dollardy qurasa, jobany iske asyrýdyń ekinshi jáne úshinshi kezeńderi taǵy 1 mlrd dol­lar­ǵa baǵalanýda. Alǵashqy kezeńde qaıta óńdeý qýaty jylyna 3 mln tonnaǵa deıin ósý perspektıvasymen 1 mln tonnany quraıdy. 2 myńǵa jýyq jumys orny ashylady.

Jobada kómir jylý elektr stansasy men kómir hımııasy kesheniniń qurylysy da qarastyrylǵan. Kómirdi qaıta óńdeý nátıjesinde jylyna 150-400 myń tonna suıyq ammıak alynady dep kútilip otyr.

Jalpy, jańa agrojobany iske asyrý mýltıplıkatıvti áser beredi, aýyl sha­rýashylyǵyn jańǵyrtýǵa yqpal etedi, son­­daı-aq logıstıka jáne saýda sekildi en­shi­les salalardyń damýyna serpin beredi.

Premer-mınıstr astyq jınaýda rekordtyq kórsetkishterge qol jetkizýdi eskere otyryp, bıdaıdy qaıta óńdeýdi belsendi túrde arttyrýdyń mańyzdy ekenine toqtaldy.

«Qazaqstan – agrarlyq sektory damy­ǵan el. Biz qosylǵan quny joǵary ónim shyǵarýdy arttyrýǵa umtylamyz. Bul – bizdiń elimiz úshin basym baǵyt. Úkimet óndiristi loklızasııalaýǵa jáne ozyq tehnologııalardy transfertteýge baǵyttalǵan», dep atap ótti O.Bektenov.

Dalian Hesheng qytaılyq kompanııalar toby basqarma tóraǵasy­nyń orynbasary Ma Hýnhan óz kezegin­de Qazaqstandaǵy yntymaqtastyq pen óndiristi damytý keleshegin joǵary baǵalady. Qolaıly iskerlik ahýal jáne bıznesti júrgizýge jasalǵan jaǵdaı atap ótildi. Ma Hýnhan zaýyttyń qurylysyn 2025 jyldyń ekinshi toqsanyna josparlanyp otyrǵanyn aıtty.

Sondaı-aq kezdesý barysynda Dalian Hesheng Holdings Group kompanııa­synyń agrarlyq baǵyt jónindegi basqar­ma tóraǵasy Iýı Iýfeı, bıdaı bıo­fer­mentasııasynyń biregeı tehnologııa­syn ázirleýshi jáne saladaǵy ozyq sheshimderdiń avtory, aǵa ınjener Shý Songpo sóz sóıledi.

Kezdesý qorytyndysy boıynsha Premer-mınıstr múddeli memlekettik organdarǵa qysqa merzimde qytaılyq áriptestermen ınvestısııalyq kelisim jasaý boıynsha tıisti jumystar júrgizýdi tapsyrdy.