Foto: Qazaqstan temir joly
Qazaqstan - Eýropa men Azııany baılanystyratyn mańyzdy tranzıttik memleket. Dese de, depýtattardyń pikirinshe, osyndaı strategııalyq múmkindik jetkilikti deńgeıde paıdalanylmaı otyr.
Qazirgi ýaqytta otandyq tasymaldaýshylar avtoparkti jańartý barysynda qatań ekologııalyq standarttardy (kem degende Eýro-4) saqtaýǵa mindetti, ıaǵnı odan tómen deńgeıdegi avtokólikti ákelýge tyıym salynǵan. Al sheteldik tasymaldaýshylar Qazaqstan joldarynda kez kelgen ekologııalyq standarttaǵy avtokólikterdi erkin paıdalanady. Depýtattar mundaı olqylyqtar otandyq bıznesti teńsiz jaǵdaıǵa qoıyp, damýyna kedergi keltiretinin aıtyp, mınıstrliktiń nazar aýdarýyn surady.
Májilismender otandyq jáne sheteldik tasymaldaýshylarǵa qoıylatyn talaptyń alshaqtyǵyna narazylyq bildirip, keıingi 15 jylda osy teńsizdikti joıýǵa arnalǵan sharalar qabyldanbaǵanyn aıtty.
Al áýekompanııalary qoldanylǵanyna 25 jyldan asqan ushaqpen júk tasymaldaýǵa tyıym salynǵanmen, bul norma adam tasymalynda eskerilmeıtinin de atap ótti.
Bul talaptar Halyqaralyq azamattyq avıasııa uıymynyń (ıaǵnı IKAO) standarttaryna sáıkes kelmeıtini anyq. Depýtattar osy máselege kóńil aýdaryp, mınıstrden mundaı jaǵdaı qalyptasýyna nelikten jol berilgenin surady.
