Foto: gov.kz
Turǵyndarǵa Taldyqorǵanda 37 jańa páterdiń, Sarqan qalasynda 20 jeke turǵyn úıdiń kilti tabystaldy.
«2022 jyly turǵyn úı kezeginde turǵan azamattar úshin 5 qabatty 50 páterli úı, ótken jyly «Bolashaq» shaǵyn aýdanynda eki qabatty 20 páterli turǵyn úı qoldanysqa berildi. Buǵan qosa, aýdannyń áleýmettik osal toptaǵy azamattary úshin 24 turǵyn úı satyp alynyp, berildi. Búgin 20 úıdiń kilti tapsyrylsa, budan bólek, jaqyn arada osy tıptegi 30 turǵyn úıdiń qurylysy aıaqtalyp, qoldanysqa beriledi», dedi Sarqan aýdanynyń turǵyn úı-kommýnaldyq sharýashylyǵy, avtomobıl joldary, jolaýshylar kóligi jáne turǵyn úı ınspeksııasy bóliminiń basshysy Áset Qanapııanov.
Búgin jańa úıge ıe bolǵandar qatarynda jetim balalar, múgedektigi bar balany tárbıeleýshi otbasylar, múgedektigi bar azamattar, kóp balaly analar, tolyq emes otbasylar, Uly Otan soǵysynyń ardagerlerine teńestirilgender bar.
«Búgin kópten kútken páterimizdi aldyq. Múgedektigi bar balamyzdyń densaýlyq jaǵdaıyna qolaıly jańa páterge ıe bolǵanymyzǵa qýanyshtymyz. Kezekte 10 jyldan asa ýaqyt turyp, asyǵa kútken kúnge de jettik, raqmet», dedi J. Bolatbekova.
Jetisý oblysynda bıyl turǵyn úı qurylysyna 7,6 mlrd. teńge bólingen. Bul qarjy 56 kóp qabatty men 214 jeke turǵyn úı salýǵa baǵyttalǵan. Budan bólek, halyqtyń áleýmettik osal toptary úshin 866 páter satyp alyndy, oǵan 15,9 mlrd. teńge bólingen.
