Qysqy maýsymda otbasylyq demalysqa taptyrmaıtyn oryn «Zelenyı kvartal» turǵyn úı kesheni aýdanynda ornalasqan. Jańa qoǵamdyq keńistikte turǵyndar muz aıdyny, syrǵanaqtan bólek, basqa da qysqy oıyn-saýyq túrlerin qyzyqtaı alady.
«BI Group» kompanııasy men Nura aýdanynyń ákimdigi «Býharest» saıabaǵyn resmı túrde ashty. Bul – aýdanda ornalasqan alǵashqy qysqy qalashyq. Munda muz aıdyny, syrǵanaqtar, kózdiń jaýyn alar jeti metrlik shyrsha bar. Saıabaqtyń ózi jańajyldyq úlgide bezendirilgen. Biz elorda turǵyndary men qonaqtaryn qoǵamdyq keńistikke kelip, demalys kúnderin kóńildi ótkizýge shaqyramyz», deıdi «BI Group» ókili, joba jetekshisi Baýyrjan Salyqov.
Uıymdastyrýshylar serýendep kelgen jurtqa jańajyldyq kóńil kúı syılaýǵa erekshe kóńil bólgen eken. Qonaqtardy ertegi keıipkerleri – Grınch, Grın Santa, Aqshaqar, elfter men qoıandar qarsy aldy. Balalarǵa erekshe oıyn-saýyq baǵdarlamasy usynyldy. Ártister bı bılep, teatrlandyrylǵan qoıylym qoıdy.
«Biz Nura aýdanynyń turǵyndary retinde muz aıdyny, syrǵanaq, merekelik shyrshasy bar jańa qoǵamdyq keńistiktiń ashylǵanyna qýanyp otyrmyz. Qysqy oıyn-saýyq ásirese balalarymyzǵa erekshe áser syılaıdy. Qazir jurt taza aýada serýendegendi jaqsy kóredi. Osy iske erekshe kóńil bólgen aýdan ákimdigine alǵysym sheksiz. Endi serýendeý úshin alysqa barýdyń qajeti joq, jańa qoǵamdyq keńistik úıimizden bes mınýt jerde ornalasqan», – deıdi Aıdana esimdi aýdan turǵyny.
Mereke kúnderi astanalyqtar, Nura aýdanynyń turǵyndary otbasymen, dostarymen bos ýaqytyn kóńildi ótkize alady. Bıyl Astanada osyndaı 170 aýla men qoǵamdyq keńistik abattandyryldy. Mundaı qoǵamdyq keńistikter qalanyń barlyq aýdanynda ashylady.
