Máselen, Jylyoı aýdandyq polısııa bóliminiń qyzmetkerleri 25 jastaǵy kúdiktini ustady. Ol Aqkıiztoǵaı aýylynda 14 márte urlyq jasap, 34 iri qarany jymqyrǵan. Kúdiktiniń zańsyz áreketinen mal ıelerine 5 mln teńge shyǵyn kelgen.
«Jedel izdestirý is-sharasy kezinde mal urlyǵyna qatysy bar degen kúdikti ustady. Kúdikti – Qulsary qalasynyń turǵyny. Buǵan deıin urlyq jasaǵany úshin qylmystyq jaýapkershilikke tartylǵan. Ustalǵan kúdikti urlaǵan iri qarany satý úshin áleýmettik jelige habarlandyrý jarııalap otyrǵan. Urlanǵan maldy satyp alǵan turǵyndar da anyqtaldy», dep habarlady polısııa departamentiniń baspasóz qyzmeti.
Tintý júrgizý kezinde kúdiktiniń mobıldi telefonynan urlanǵan maldyń fotosýretteri men satyp alýshylar arasyndaǵy jazbalar tabyldy. Kúdikti kinásin moıyndap otyr. Qazir kúdikti qamaýǵa alyndy. Polısııa qyzmetkerleri qosymsha dálelder jınaý úshin telefon qońyraýlarynyń bıllıngisin tekserip jatyr. Mal urlyǵyna basqa da adamdardyń qatysynyń bar-joǵyn tekserý qolǵa alyndy.
Al Qyzylqoǵa aýdandyq sotynda 13 jábirlenýshiniń malyn urlap, 6,9 mln teńge shyǵyn keltirgen er adamǵa qatysty is qaraldy. Ol da bótenniń malyn jasyryn túrde birneshe ret jymqyrǵan. Sol sebepten oǵan Qylmystyq kodekstiń 188-1-babynyń 3-bóliginiń 1-tarmaǵymen aıyp taǵylǵan.
«Aıyptalýshy Q. óziniń sharýa qojalyǵynyń aýmaǵynda bótenniń birneshe sıyry jaıylyp júrgenin kórip, paıdakúnemdik nıetpen jasyryn jymqyrǵan. Bul isin birneshe ret qaıtalaǵan. Urlaǵan maldy satyp, aqshasyn óz qalaýy boıynsha jumsaǵan. Onyń kinási óziniń jáne jábirlenýshilerdiń jaýaptarymen, qylmystyq is materıaldarymen dáleldendi», dep málimdedi aýdandyq sottan.
Atalǵan iste bir jaıtqa nazar aýdaryldy. Bul – sottalýshynyń qylmys jasaǵan kezde burynǵy urlyǵy úshin probasııalyq baqylaýda júrgeni.
Osyǵan baılanysty prokýror aıyptalýshyǵa jaza taǵaıyndaý kezinde eki bapty qoldanýdy usyndy. Birinshisi – aıyp taǵylǵan bappen múlkin tárkileýsiz, 6 jylǵa bas bostandyǵynan aıyrý. Al ekinshisi – Qylmystyq kodekstiń 60-babynyń 1-bóligi negizinde burynǵy úkim boıynsha jazasynyń ótelmegen bóligin ishinara qosý arqyly túpkilikti 7 jyl merzimge bas bostandyǵynan aıyrý jazasyn taǵaıyndaý.
Múıizdi iri qarasy urlanǵan jábirlenýshilerdiń birqatary qatań jaza taǵaıyndaýdy surady. Keıbiri jaza taǵaıyndaý máselesin sottyń quzyryna qaldyrdy.
Jaza taǵaıyndaý kezinde birneshe jaıt eskerildi. Birinshiden, sottalýshy kinásin moıyndap, ókinishin bildirgen. Ekinshiden, onyń jas balalary bar. Mine, osyndaı sebepter jazany jeńildetetin mán-jaılar retinde qaraldy. Alaıda sottalýshy tótenshe jaǵdaı kezinde qylmystyq quqyq buzýshylyq jasaǵany eskerýsiz qalmady. Al bul – jazany aýyrlatatyn mán-jaı.
«Sot úkimimen aıyptalýshy Q. Qylmystyq kodeksiniń 188-1-babynyń 3-bóliginiń 1-tarmaǵymen kináli dep tanyldy. Oǵan 60-baptyń 1-bóligimen túpkilikti 7 jyl merzimge bas bostandyǵynan aıyrý jazasy taǵaıyndaldy», dep málimdedi aýdandyq sottan.
Atyraý oblysy
