Foto: www.dha.com.tr
Oqıǵa týraly provınsııa gýbernatory Ismaıl Ýstaoǵly habarlap, zaýytta barlyǵy 630-ǵa jýyq adam jumys isteıtinin málimdegen.
Jarylystyń sebebi anyqtaý maqsatynda tergeý júrip jatyr. Jergilikti bılik kúshti jarylysqa sebep bolǵan jaǵdaılar men faktorlardy anyqtaý úshin jaqyn arada saraptama júrgiziletinin habarlady.
«Jarylystyń sebepterin tergeý bastapqy satyda jáne terrorıstik akt nemese oqıǵanyń basqa sebepteri týraly boljaý áli erte. Biz qaza bolǵan adamdardyń týystaryna shyn júrekten kóńil aıtamyz jáne zardap shekkenderdiń tezirek saýyǵyp ketýin tileımiz», dedi gýbernator.
Sonymen birge bul oqıǵa qoǵamda jarylǵysh zattardy óndirýmen baılanysty kásiporyndardaǵy qaýipsizdik sharalaryna qatysty pikirtalas týdyrǵan. Jergilikti turǵyndar da zaýyttyń eldi mekenderge jaqyn jerde ornalasqanyn, aýyr zardaptarǵa ákep soqtyrýy múmkin ekenin aıtyp, alańdaýshylyqtaryn bildirgen.
