Sýret: Zakon.kz
Oqıǵa Semeı qalasynyń ortalyq alańynda jańa jyldyq shyrshany qurý jáne bezendirý kezinde 21 jeltoqsan kúni oryn alǵan. Oblystyq bilim basqarmasynyń deregine sensek, sol kúni saǵat 15.00-de muǵalimderdi jańa jyldyq shyrshany bezendirýge tartý faktisine qatysty shuǵyl keńes ótkizilgen. Keńeste oblys ákimi oqıǵanyń barlyq mán-jaıyn anyqtaý úshin qyzmettik tekseris júrgizýdi, al densaýlyq saqtaý basqarmasyna zardap shekken Semeı qalasyndaǵy №49 mekteptiń qazaq tili men ádebıeti pániniń muǵalimi Qýat Aıtqalıevtyń jaǵdaıyn baqylaýǵa alýǵa tapsyrma bergen.
Zańsyz jumysqa tartý faktisi boıynsha qyzmettik tekseris qorytyndysyna sáıkes qaladaǵy úsh birdeı mekteptiń, atap aıtar bolsaq №49, №40 jáne №19 mektep ustazdaryn shyrshany bezendirýge qatystyrǵany úshin atalǵan oqý oryndarynyń dırektorlary qatań sógis aldy. Buǵan qosa, Semeı qalalyq bilim bóliminiń basshysy Birjan Zamanbekuly qyzmetinen bosatyldy. Jaǵdaıdy úılestirgen qala ákiminiń orynbasary Araıbek Hamzaevqa qatań sógis jarııalandy.
Abaı oblysy bilim basqarmasynyń basshysy Nurjan Ahmetqalıevtyń sózinshe, bul muǵalimder quqyn buzý men zań talaptaryna qaıshy áreket ekeni anyqtalǵan. Jaǵdaı oblys basshysynyń qatań baqylaýynda turǵanyn da eskertti basqarma basshysy.
Oqys oqıǵaǵa dýshar bolǵan Qýat Aıtqalıev ustazdyq qyzmetimen birge oqyrmandaryna jyly shyǵarmalarymen tanylǵan jas qalamger. Qýat Aıtqalıevtiń shyr-pyr bolyp shyndyq izdegen zaıyby Symbat Aıanqyzy muǵalimdi demalys kúni zańsyz jumysqa tartý pedagog quqyǵyn aıaqqa basý dep esepteıdi. Shyrshany quryp jatyp, 4-5 metr bıikten qulaǵan muǵalimniń áıeli jýrnalısterge bergen suhbatynda sol kúni kúıeýine «alańǵa baryp, shyrsha qurasyńdar» degen buıryq mektep dırektorynan túsken. Al mektep basshysyna bul nusqaý qalalyq bilim bóliminen bolǵan kórinedi.
«Semeı qalasy ákimniń shyrshasyn qurý men bezendirýge 30 mln teńge bólingen, al ony muǵalimder qurdy. Joldasym 4-5 metr bıikten qulaǵan. Álibı degen dosy ári áriptesi habarlasyp mekteptiń dırektory Gúlfarıza Toqtaýbaıqyzynyń: «Erteń tańǵy saǵat 08.00-09.00 aralyǵynda alańǵa baryp, shyrsha qurasyńdar» degen buıryq bergenin aıtty. Kúıeýim tańǵy saǵat 09.30 kezinde alańǵa jetip, shyrsha qurýǵa kirisken», deıdi Symbat Aıanqyzy.
Qazir aýyr jaraqat alǵan muǵalim jansaqtaý bóliminde esin jıǵan. Bassúıegine zaqym kelgen. Oqıǵa bolǵan kúni shuǵyl ota jasalǵan. Alaıda úsh aı ótken soń ekinshi kúrdeli ota jasaý josparda bar deıdi dárigerler.
22 jeltoqsan kúni óziniń feısbýktegi jeke paraqshasynda Oqý-aǵartý mınıstri Ǵanı Beısembaev osy oqıǵa boıynsha oıyn ortaǵa salyp, aýyr jaǵdaıǵa tap bolǵan muǵalimniń jaǵdaıy qatań baqylaýǵa alynǵanyn jetkizdi.
«Semeı qalasynda muǵalimderdi jańajyldyq shyrshany bezendirýge tartý jáne áriptesimizdiń osy is barysynda jaraqat alýy – zań buzýshylyqtyń aıqyn kórinisi.
Pedagogterdiń kásibı mindetterine jatpaıtyn mundaı jumystarǵa tartý – «Pedagog mártebesi týraly» zańdy óreskel buzý dep sanaımyn. Bul oqıǵaǵa baılanysty oblys basshylyǵy ádil ári jan-jaqty tekserý júrgizip, aldaǵy ýaqytta mundaı keleńsizdikterdiń qaıtalanýyna jol bermeý úshin tıisti sharalar qabyldaıdy dep úmittenemin.
Qýat Aıtqalıevtiń otbasyna shynaıy qoldaý bildire otyryp, onyń tezirek saýyǵýyn tileımin. Qazirgi ýaqytta oǵan barlyq qajetti medısınalyq kómek kórsetilip jatyr. Bul jaǵdaı erekshe baqylaýǵa alyndy», deıdi mınıstr.
Memleket basshysy pedagogterdiń qoǵamdaǵy róline erekshe mán berý kerektigin basty nazarda ustap keledi. Olardyń quqyqtaryn «Pedagog mártebesi týraly» zań aıasynda muǵalimderge úlken qoldaý ekeni belgili. Olardy qoǵamdyq jumysqa tartý, zańsyz eńbekke májbúrleý zań sheńberinen shyǵý, zańdy buzý faktisin áıgileıdi.
Bilim salasynda bıikke kóterilip, ǵylymnan ǵıbrat izdegen, ádebıetti bar ómiriniń mánine aınaldarǵan jas pedagogtiń keleshektegi jaǵdaıy ne bolmaq degen saýal jaqyn janashyrlaryn alańdatyp otyr. Aıaq-qoly synyp emes, bassúıegi synyp, mıyna zaqym kelgendikten aptaldaı azamattyń aýyr hali aldymen otbasyna aýyr salmaq ekeni aıtpasa da aıqyn jaıt. Týystary sotqa aryzdanyp, naqty kinálilerdi jazaǵa tartylýyn talap etpek.
