Foto: Týrızm jáne sport mınıstrligi
- Eldos Baqtybaıuly, Parıj Olımpıadasyndaǵy jarqyn jeńisińiz arqyly Qazaq elin qýanyshqa kenelttińiz. Tórtjyldyqtyń basty básekesindegi osy jeńisten keıin elge oralǵanda kelesi Olımpıadaǵa qatysýǵa nıetti ekenińizdi aıttyńyz. Qazir daıyndyqqa kiristińiz be?
- Los-Andjelestegi Olımpıadaǵa alda áli 3 jyl bar. Sondyqtan daıyndyq aıtarlyqtaı deńgeıde bastalǵan joq. Qazir kishigirim jaraqattarymdy emdep júrmiz. Aǵzany, deneni demaldyryp, qalypqa kelý prosesi júrip jatyr. 2025 jyldyń sońy men 2026 jyldyń basynda naqty daıyndyqty bastaımyz, buıyrsa. Dese de, formamyzdy saqtaý úshin kún saıyn jattyǵý zalynan tabylamyz.
- Úsh Olımpıada qatarynan joǵary dárejeli 3 medaldi qanjyǵalap, «Olımp shyńynan» kóriný úshin sizge jiger berip, alǵa jetelegen qandaı kúsh?
- Men 5 jasymnan bastap dzıýdomen aınalysyp kele jatyrmyn. Bala shaqtan janyma jaqyn sporttan nátıje shyǵarǵym keledi. Sporttyń shyńyn baǵyndyrǵan tulǵalardyń ár qadamyn árdaıym baqylap otyratynmyn. Uqsap baǵýǵa tyrystyq. Chempıondardyń jeńis jolyn zerttedim. Jattyǵý zalynda jyldar boıy ter tógilgeni de sózsiz. Tórtjyldyqtyń eń bıik tuǵyrynda turý mártebesi buıyrǵan osy jylǵa rızamyn. Dúnıedegi basty maqsatym - ataq-dúnıe jınaý emes, adam bolyp qalý.
- Janyna sportty serik etken azamattyń armanyna aınalǵan Olımpıada chempıonyn aldaǵy ýaqytta memlekettik mansap minberinen kórýimiz múmkin be?
- Qazir meniń aldymda bul mazmundaǵy maqsat joq. Men áli de sporttan alystamaǵanym anyq. Jaqsy kóretin dzıýdomen múmkindigim bar tusta sarqylmaı, kidirmeı aınalysqym keledi. Qazir jasym 32-de, Los-Andjelestegi baıraqty báseke kezeńinde 35-36 jasta bolamyz. Parıj Olımpıadasynda 36 jastaǵy Demeý Jadyraev qaǵıdalardy buzyp, dúbirli dodanyń fınalynda baq synady. Aldymyzda osyndaı úlgi bar. Bir qazaq shyqqan bıikti, ekinshi qazaq ta eńsere alady dep oılaımyn. Jas – aýysyp jatqan jaı kórsetkish, sıfr. Men de osy qadam arqyly jastarǵa múmkin emes nárse bolmaıtynyn dáleldep, olardyń da talmaı eńbek etýi úshin stımýl bolǵym keledi. Sporttyq mansabymdaǵy joǵary jeńisimnen keıin el ishinde dzıýdoǵa nazar arta tústi, tipti, kúrespen aınalysýdy toqtatqan keı azamattardyń belin býyp, jattyǵý zalyna oralǵan oqıǵalardy da qulaǵymyz shalyp jatyr. Bapkerler baldyrǵan balalar arasynda dzıýdomen aınalysqysy keletinderdiń qatary qalyńdaǵanyn da habardar etip jatyr. Qazaq tanymda «eki kemeniń basyn ustaǵan sýǵa ketedi» degen ataly sóz bar. Sondyqtan qazir sporttan irgemdi alys salmaımyn.
- Eldos, aldaǵy jyldyń basynda Londonǵa attanbaqsyz. Qaı baǵytta bilim alýdy josparlap otyrsyz?
- Shetel asyp, oqýǵa attanýyma aǵylshyn tilin meńgerý maqsaty túrtki boldy. Qańtar aıynan bastap Londonda 4 aı oqý, til úırenýdi mejeledim. Sebebi 2028 jyly Los-Andjeles Olımpıadasy kútip tur, 2027 jyly elordamyz dzıýdodan álem chempıonatyn qabyldaıdy. Iri báskelerde sportshylarmen tildesip, tájirıbe almasýda aǵylshyn tilin bilý jańa múmkindikterge jol ashatynyna senemin.
- Eldos Baqtybaıuly, áńgimeńizge raqmet!
