Foto: Májilistiń baspasóz qyzmeti
Bıyl Memleket basshysynyń qatysýymen alǵash ret máslıhattardyń respýblıkalyq forýmy ótti.
Jıyn mańyzdy memlekettik sheshimder qabyldaýǵa búkil Qazaqstan qoǵamyn jumyldyrýdyń taǵy bir tıimdi tetigine aınaldy. Aýqymdy is-shara saıası partııalardan, bir mandatty okrýgterden saılanǵan máslıhat depýtattaryn, sondaı-aq Úkimet múshelerin alǵash ret bir alańda bas qosýyna sep boldy. Májilis tóraǵasy Erlan Qoshanov bul bastamany ortalyqtan óńirlerge deıingi bıliktiń barlyq tarmaǵy arasyndaǵy jalpyhalyqtyq dıalogtyń jańa formaty ekenin atap ótti.
«Áleýmettik ádildik ornatýǵa baǵyttalǵan konstıtýsııalyq normalar bıyl tolyq iske asyryla bastady. Qabyldaǵan zańdardyń nátıjesin qazirdiń ózinde kórip otyrmyz. «Ulttyq qor – balalarǵa» jobasy men qoldy bolǵan kapıtaldy qaıtarý týraly zań – osyǵan aıqyn dálel. Jyl basynan beri balalardyń jınaqtaýshy shottaryna alǵashqy kiris túsip, zańsyz shyǵarylǵan aktıvterge elde áleýmettik nysandar salyna bastady», dedi Erlan Qoshanov.
Osy saıası maýsymda qoǵamnyń dertine aınalǵan túıtkildi máselelerdi sheshý úshin Májilis birqatar zań qabyldady. Oıyn bıznesi týraly zań, sol sııaqty veıpke tyıym salý týraly normalardyń iske asyp otyrǵanyn atap ótken jón.
Biz esirtkige qatysty qylmystar úshin jazalaýdyń saralanǵan tásili jónindegi Prezıdenttiń tikeleı tapsyrmasyn zańnamalyq deńgeıde oryndadyq.
«Zań arqyly biz esirtki óndirý men taratý arasyndaǵy jaýapkershiliktiń ara-jigin ajyrattyq. Sonymen qatar, esirtki óndirýdi eń aýyr qylmystarǵa teńestirip, ol úshin jaýapkershilikti meılinshe kúsheıttik. Osylaısha, esirtki tutyný sııaqty beleń alǵan dertke depýtattar tarapynan taǵy bir tosqaýyl qoıyldy. Halyqaralyq qoǵamdastyq otbasyndaǵy jáne turmystaǵy zorlyq-zombylyq týraly zańǵa joǵary baǵa berdi. Bul zańdy Birikken Ulttar Uıymy «genderlik zorlyq-zombylyqty joıý jolynda jasalǵan qadam» dep atap, Astanaǵa alǵysyn bildirdi», dedi Májilis tóraǵasy.
Sessııa barysynda májilismender jańa ekonomıkalyq saıasattyń zańnamalyq negizin qalaý jumysyn da basty nazarǵa alyp, jańa Bıýdjet kodeksin qabyldady. Olar sol arqyly bıýdjet qarajatyna degen kózqarasty túbegeıli ózgertýdi kózdeıdi.
«Bıýdjet zańnamasynyń negizgi qaǵıdaty – qarajatty utymdy, únemdi ıgerý jáne naqty qajettilikke baǵyttaý. Depýtattardyń usynysy boıynsha memleketttik sektor qarajaty endi tolyǵymen Parlament baqylaýynda bolady. Sonymen birge Bıýdjet kodeksi arqyly biz aımaqtarǵa kóbirek derbestik berip otyrmyz. Birqatar túsimderdi respýblıkalyq deńgeıden jergilikti deńgeıge berý jónindegi sharalar da kózdelgen. Sondaı-aq aýdan ákimderiniń ókilettigin keńeıtý úshin shaǵyn jáne orta bıznesten alynatyn korporatıvtik tabys salyǵy men jeke tabys salyǵy oblystyq deńgeıden aýdandyq deńgeıge beriledi. Munyń bári keleshekte jergilikti jerlerde resýrstardy tıimdi ıgerýge yqpal etedi», dedi Erlan Qoshanov.
Májilis jyldyń sońǵy jalpy otyrysynda Memleket basshysynyń tapsyrmasymen Túrkistanǵa erekshe mártebe berýge baǵyttalǵan zańdy da qabyldap úlgerdi. Mundaı mártebe jergilikti máselelerdi anaǵurlym tıimdi sheshýge, ınvestısııa tartýǵa múmkindik berip, óńir ekonomıkasynyń odan ári damýyna septigin tıgizbek.
