Keleli keńeske kelgen qurmetti qonaqtardy mektep oqýshylary jyrdan shashý shashyp qarsy aldy. Odan soń aqynnyń 85 jyldyq mereıtoıyna arnap jasalǵan bareleftiń ashylý rásimi ótti. Ǵylymı jıynnyń tizginin Ulttyq quryltaı múshesi, UǴA akademıgi Kárimbek Qurmanálıev ustady. Sharada R.Muqanova, I.Elekeev, B.Áıtimova, Á.Bımendına, D.Qamzabekuly, E.Tileshov, E.Qalmaqov, Q.Senǵazıev, G.Eńsepova, N.Ysqaqov syndy mádenıet, ǵylym, aqparat, bilim salasy ókilderi baıandama jasady. Aqyn murasy týraly oramdy oılaryn ortaǵa saldy.
«Onyń aqyndyq tulǵasy men ózine tán órshil minezi, ózgeshe taǵdyry basqalarmen salystyrýǵa kelmeıdi. Erekshe oqshaý turdy. Farıza – jan sulýlyǵyn qalaǵan aqyn. Ol óleńniń lázzatyna da, azabyna da moıynsundy. О́mirdi óleń dep tanydy», dedi jazýshy, dramatýrg Roza Muqanova.
Konferensııa barysynda «Áıel atty ulylyq!» atty ádebı mýzykalyq qoıylym sahnalandy. Seksen bes oqýshy aqynnyń óleńine jazylǵan ánderdi oryndap, sahnany erekshe sánge bóledi.
«Bul sharanyń elordada aqyn atyndaǵy mektepte ótýi – bilim salasynyń abyroıy» dedi Oqý aǵartý mınıstrliginiń departament dırektory Erlan Qalmaqov.
