Berekeli Bykov

Shyǵys óńirinde Qazaqstan halqy Assambleıasynyń 20 jyldyǵy aıasynda kóptegen qaıyrymdylyq jobalary júzege asyrylyp jatyr. Aıtalyq, «QHA – 20 izgi is» jobasy sheńberinde Vladımır Koshelev Glýbokoe aýdanynyń Beloýsovka kentindegi Jastar kóshesi boıynda ornalasqan №8 kóppáterli turǵyn úıge jylý qubyryn tartyp berdi. Sondaı-aq, ol Beloýsovka kentindegi mektepke qarjylyq qoldaý kórsetip, aýdandaǵy ardagerlerge, qoǵamdyq uıymdarǵa materıaldyq kómek úshin 8 mıllıon teńgeden astam qarjysyn jumsasa, Semeı qalasyndaǵy «Báı­­sheshek» balabaqshasy jaǵ­daıy tómen otbasylardyń balalaryna 21 mıllıon teńge bóldi. Semeılik «Vozrojdenıe» uıymy múmkindigi shekteýli balalar men jalǵyzbasty, kembaǵal jandarǵa 3 mıllıon teńgeden astam qarajat jumsady. Osy sııaqty jumystar ob­lys­­­tyń basqa da qalalary men aýdandarynda atqarylýda. Ásirese, «Qazmyrysh» JShS bas­qarýshy dırektory Andreı La­zarev, Ulttyq ıadrolyq ortalyq qyz­metkeri Sergeı Kýznesov, «Shy­ǵysqurylys» JShS dırektory Nurlan Turarov jáne basqa da kásip­oryndar ókilderi men jeke kásipkerlerdiń ıgi isterin tizbelep aıta berýge bolady. Sondaı izgi jandardyń biri Ser­geı Bykovty óńir turǵyndary jaqsy biledi. Borodýlıha aýda­nynyń Krasnyı Iаr aýylynda turatyn Sergeı Nıkolaevıch týǵan aýylynyń atymen atalatyn sharýa qojalyǵynyń jetekshisi. 1998 jyly tirkeýden ótken sha­rýa­shylyq búginde aýdandaǵy biregeı áleýetti jumys berýshi kásiporynǵa aınalyp qana qoımaı, áleýmettik máselelerge de den qoıýymen erekshelenedi. Mal jáne egin sharýashylyǵymen shuǵyl­danatyn «Krasnyı Iаr» qojalyǵy 8 myń gektarǵa jýyq jer telimin maqsatty túrde paıdalanyp otyr. Jyl saıyn irgelengen sharýa qojalyǵy búginde 40 traktor, 20-ǵa jýyq kombaın men 10 júk kóliginen turatyn materıaldyq-tehnıkalyq bazasyn jasaqtady. Qojalyqta bıdaı, suly, ar­pa, kúnbaǵys ósirilip, 300-den as­tam iri qara, 200-den astam jyl­­­qy baǵylady. Barlyq iste aýyl­dastarynyń qoldaýy men súıis­penshiligine ıe bolǵan sharýa qo­jalyǵynyń jetekshisi Sergeı Bykov aýdandyq máslıhattyń úsh shaqyrylymyna depýtat bolyp saılandy. Bilikti maman máslıhattyń agroónerkásiptik keshen, ekologııa jáne qorshaǵan ortany qorǵaý jónindegi turaqty komıssııasynyń tóraǵasy ekenin de aıta keteıik. Eń bastysy, «Krasnyı Iаr» sharýa qojalyǵynyń shapaǵaty tımegen aýyl turǵyndary neken-saıaq. Qan­shama jumys kózin taýyp bergen qojalyqtyń qaıyrymdylyq sharalarymen aty shyqqan deý­ge bolady. Máselen, Krasnyı Iаr aýylynda Sergeı Bykovtyń demeýshiligimen búldirshinderge arnalǵan shaǵyn ortalyq boı kóterdi. Bos turǵan ǵımaratqa kúrdeli jóndeý júrgizýdiń nátı­jesinde atalǵan nysan mektepke deıingi mekemege aınaldy. Osy arqyly aýyl balalarynyń tegin balabaqshamen qamtylýyna kó­mek qolyn sozǵan kásipkerdiń izgi áreketine súısinbeske áddińiz qalmaıdy! Bul jobaǵa kásipker 9 mıllıon teńge qarajatyn jum­sady. Qazir shaǵyn ortalyqta 25 búldirshin tárbıelenýde. Ol, sondaı-aq, jańa týǵan sábı­ler men áleýmettik jaǵynan az qam­tylǵan otbasylaryna úne­mi kómek kórsetip júredi. Jas otbasylardyń úılený toıy shyǵy­nynyń teń jartysyn kóterisip, dúnıege kelgen ár sábıge 150 myń teńge kóleminde syıaqy berýdi dástúrge aınaldyrǵan. Osydan eki jyl buryn kámelettik jasqa tolmaǵan eki bala tárbıelep otyr­ǵan jas otbasyna baspana syılady. Úsh aýyldyq okrýgke qyzmet kórsetetin «Jedel járdem» kóligin tartý etkeni úshin aýyldastary dán rıza. Odan bólek, aýyldyq klýb­ty iske qosyp, aýdandyq zırat-qo­­rymdy qorshap berdi. Arda­gerlerge arnalǵan eskertkish ornatty. Balalar kúni men qarttar aılyǵynda, Táýelsizdik merekesi men aýyl sharýashylyǵy eńbek­kerleri kúni aıasynda aýyldastaryna turaqty syı-syıapat jasap turady. Jalpy, ol osyǵan deıin 40 mıllıon teńgeniń kómegin beripti. Atymtaı azamattyń eńbegi esh emes. Sergeı Bykov «Qurmet» ordeni men «Eren eńbegi úshin» medaliniń ıegeri, Borodýlıha aýdanynyń qurmetti azamaty atandy. Eki márte Elbasy­nyń Alǵys hatymen, Aýyl sharýa­shy­lyǵy mınıstri men oblys ákiminiń qur­met gramota­larymen, basqa da bıik dárejelermen ma­rapattalyp, Shyǵys Qazaqstan oblysynyń úzdik fermeri atandy. Osynyń barlyǵynda ólsheýsiz eńbek, aza­mattyń aqjarqyn bol­mysy men adamgershiligi, aýyl­dastarynyń aq tilegi men rızashylyǵy jatyr. Dýman ANASh, «Egemen Qazaqstan». Shyǵys Qazaqstan oblysy, Borodýlıha aýdany.