Suhbattan ishki jáne syrtqy saıasat, ekonomıka, áleýmet, qoǵamnyń damýy, memleket pen zańnyń nyǵaıýy, ádildiktiń ornyǵýy sııaqty máselelerge qatysty anyq oı, aıqyn ustanym ańǵardyq. Kóńildi kúpti etken keıbir mańyzdy suraqtarǵa da jaýap aldyq.
«Ana tili» gazetine berilgen suhbatta qazaq tiliniń jaıy, sonyń ishinde bizdiń bastamamyzben qurylǵan «Qazaq tili» endaýment qory týraly bólek aıtyldy. Bul qor qazaq tilin qoldaý, onyń qoldanys aıasyn keńeıtý, tildi oqytý ádistemesin damytý, qazaq tilindegi mazmundy kóbeıtý úshin jumys isteıdi.
Qor qurylǵanda oǵan birinshi bolyp úles qosqan Qasym-Jomart Toqaev bolatyn. Prezıdent jeke qarajatynan 7 mln teńge bólip, kópke úlgi kórsetti. Memleket basshysynyń osy qadamyna ergen elimizdiń kásipkerleri qorǵa 500 mln-ǵa tarta qarajat saldy. Qazir qorda jınalǵan qarajattyń naqty kólemi – 493 669 299 teńge.
Endaýment qoryna kelgen qarajattyń ózi jumsalmaıdy, tek sol qarajatty basqarýdan túsken ústeme tabys jumsalady. 2024 jyly «Qazaq tili» endaýment qorynyń ústeme tabysy 75 473 020 teńgeni qurady.
Bul «Qazaq tili» qoǵamynyń jumysyn jandandyrýǵa múmkindik berdi. Bir jyldyń ishinde 40-qa tarta aımaqtyq, respýblıkalyq jáne halyqaralyq is-shara ótkizdik. Tolyq aqparat «Qazaq tili» qoǵamynyń til.kz saıtynda ornalasqan.
Suhbatynda Prezıdent «Qazaq tili» endaýment qoryn qoldaý qajettigin bólek aıtty. Biz úshin bul – zor demeý, qazaq tilin keńinen qoldaýǵa jol ashatyn úlken múmkindik, asa zor jaýapkershilik júkteıtin senim. Osyndaı qoldaýy men senimi úshin Memleket basshysyna alǵys aıtamyz. Memlekettik tildi tıisti bıik tuǵyryna shyǵarý jolyndaǵy jumysymyzdy údetemiz.
Raýan KENJEHANULY,
Halyqaralyq «Qazaq tili» qoǵamynyń prezıdenti
