QOSTANAI. 1 mamyr. Qostanaı qalasynyń ortalyq alańynda 1 Mamyr merekesine oraı túrli ulttar mýzykalyq aspaptarynyń kórmesi ótti. Bul týraly egemen.kz tilshisi habarlady.
Kórmege Qostanaı oblysyndaǵy 18 etnomádenı birlestikteri óz ultynyń mýzykalyq aspaptaryn qoıdy. Onda qazaqtyń dombyrasy men qobyzy, shańqobyzy, sybyzǵysy, orystyń balalaıkasy men dambrasy, syrnaıy, tatardyń syrnaıy, bashqurttyń sybyzǵysy sekildi kóptegen aspaptardy tamashalaýǵa bolady.
Ázirbaıjan etnomádenı birlestigi jastar qanatynyń tóraıymy Zúlfııa Nábıeva: «Oblystyq Dostyq úıiniń 1 Mamyr merekesine oraı túrli ulttar mýzykalyq aspabynyń kórmesin uıymdastyrýy durys sheshim boldy. Qostanaılyqtar ár asapapty qyzyqtap ǵana qoımaı onyń únin estigisi keledi. Munyń barlyǵynyń tanymdyq jaǵy da mańyzdy» dedi. Ortalyq alańda orys, qazaq halyq aspaptar ansamblderi túrli ulttardyń shyǵarmalaryn oryndady.
Qostanaı qalasynyń turǵyny Kúláısha Jýaspaeva: «Túrli ulttardyń mýzykalyq aspaptaryn tamashaladym. Men kórmegen aspaptar da bar eken. Qyrǵyzdyń qomyzyn qyrǵyz balaǵa oınatyp, biraz tyńdadym. Koreı halqynyń samýlnorı aspabyn qostanaılyq qyzdar arnaıy Astanaǵa baryp úırenip kelipti. О́te ádemi oınady. Dostyǵymyz, osyndaı birligimiz jarasa bersin» dedi.
Adamdar birin biri bilgen saıyn olardyń dostyǵy, birligi artady. Ulttardyń mýzykalyq aspaptary kórmesi soǵan qyzmet etedi. Muny merekeni uıymdastyrýdyń basynda júrgen oblystyq mádenıet basqarmasynyń basshysy Larısa Seroýs ta qostady.
Larısa Seroýs: «Bıylǵy mereke Qazqstan halqy assambleıasynyń 20, Uly Otan soǵysyndaǵy Jeńistiń 70, Qazaq handyǵynyń 550 jyldyǵymen tustas keldi. Sondyqtan biz kóshede tek tamaq, saýda uıymdastyrmaı, merekeniń tanymdyq jaǵyna kóp kóńil bóldik. Qazaqstanda turatyn etnostardyń ulttyq mýzykalyq aspaptarynyń kórmesi sonyń aıǵaǵy. Merekege kelgender ár aspaptyń tabıǵı daýysyn estýdi qalaıtynyn aıtady. Etnomádenı birlestikter músheleri qolynan kelgenshe aspaptarda oınap berdi. Munyń barlyǵy ulttar dostyǵyn nyǵaıtady» dedi.
Názıra Járimbetova.
Derek, sýret: egemen.kz
