Sýret: dalatimes.kz
Suhbatta elimizdiń TMU aıasyndaǵy belsendiligi men túrki yntymaqtastyǵyn nyǵaıtýǵa qosqan úlesi keńinen talqylandy. Atap aıtqanda, aýqymdy jobalar men 80-nen asa is-shara uıymdastyrylǵandyǵyna basa nazar aýdaryldy.
Prezıdent 2021 jyly kúlli túrki áleminiń rýhanı astanasy bolyp jarııalanǵan kóne Túrkistan qalasynyń tarıhı róline erekshe mán berdi. Memleket basshysynyń pikirinshe, Túrkistannyń qaıta jandanýy túrki áleminiń birligin nyǵaıtýǵa zor úles qosyp jatyr.
Sonymen qatar Astanada uıymdastyrylǵan V Dúnıejúzilik kóshpeliler oıyndary túrki halyqtarynyń baı mádenı murasyn nasıhattaýda erekshe oryn alǵany atap ótildi. Bul is-shara túrki mádenıeti men dástúrin álemge tanytyp qana qoımaı, qatysýshy elder arasyndaǵy mádenı-gýmanıtarlyq yntymaqtastyqty tereńdete tústi.
Keıingi onjyldyqta TMU aıasyndaǵy saýda-ekonomıkalyq baılanystar da aıtarlyqtaı nyǵaıdy. Prezıdent 2023 jyly uıymǵa múshe elderdiń ózara aınalymy 45 mlrd dollardan asqanyn atap ótti. Bul kórsetkish ıntegrasııanyń joǵary deńgeıin jáne ózara tıimdi qarym-qatynastardyń qarqyndy damyp kele jatqanyn dáleldeıdi.
TMU sheńberindegi yntymaqtastyqtyń mańyzdy aspektileriniń biri – Transkaspıı halyqaralyq kólik baǵytyn damytý. Bul joba elimizdiń ekonomıkalyq áleýetin arttyrýda, tranzıttik múmkindikterin keńeıtýde jáne halyqaralyq ınvestısııalardy tartýda sheshýshi ról atqarady.
Qasym-Jomart Toqaevtyń suhbatynda atalǵan TMU aıasyndaǵy seriktestik elimizdiń kópvektorly syrtqy saıasatynyń ajyramas bóligi ekenin aıqyn ańǵartady. Túrki álemimen yntymaqtastyq – eldiń rýhanı, mádenı jáne ekonomıkalyq damýyn qamtamasyz etetin strategııalyq baǵyttardyń biri.
Baýyrjan ÁÝKEN,
Prezıdent janyndaǵy QSZI
Azııalyq zertteýler bóliminiń aǵa sarapshysy
