«Qalada jańadan salynǵan «Modern» jáne «Latıfa» turǵyn úı keshenderinen berilgen jańa páterlerge apatty úılerdi panalap kelgen, áleýmettik turmysy tómen otbasylar men kezekte turǵan turǵyndar qonystandy. Bul – turǵyndardyń ál-aýqatyn arttyrýǵa baǵyttalǵan memlekettik baǵdarlamalardyń jemisi», deıdi Sh.Keıkın.
Sondaı-aq Atyraý qalasynyń mańyndaǵy Damby jáne Aspa aýyldarynan birneshe otbasy jańa qonysqa kóshirildi. Zaroslyı aýylyndaǵy jańadan salynǵan jeke úıge ıe bolǵandardyń qatarynda Aspa eldi mekeniniń turǵyny Dármııa Shyńǵalıeva da bar. Onyń aıtýynsha, kóktemgi sý tasqyny kezinde atalǵan eldi mekenge qaýip tóngen.
Jańa jyl taıaǵan sátte taǵy 91 otbasy jańa páterge ıe bolyp, qýanyshqa keneldi. Endi olar 2025 jyldy jańa qonysta qarsy alatyn boldy.
«Jańa jyl qarsańynda 91 otbasyna jańa páter berilip otyr. Jańa qonysqa kóshkenderdiń arasynda áleýmettik turmysy tómen, kópbalaly jáne asyraýshysynan aıyrylǵan otbasylar men múmkindigi shekteýli jandar, erekshe balalardy tárbıelep otyrǵandar bar. Ata-ana qamqorlyǵynan tys qalǵan jastarǵa da páter berildi. Jergilikti ákimdik osyndaı sanattaǵy turǵyndardyń turmysyn jaqsartýdy jalǵastyra beredi», deıdi Sh.Keıkın.
Jańa baspana «Aıagóz» jáne «Latıfa» turǵyn úı kesheninen berilgen. Eki jáne úsh bólmeli páterler barlyq zamanaýı talapqa saı salynǵan. Jańa páterge ıe bolǵan turǵynnyń biri – Elmıra Sadyqova. Onyń kúıeýi múmkindigi shekteýliler sanatyndaǵy I top múgedegi.
«Biz bul baspanany kóp jyl kúttik. Turǵyn úı kezeginde 10 jyldan beri turamyz. Sonda da úmit úzbedik. Mine, jańa jyl qarsańynda sol úmitimiz aqtalyp, baspanaǵa qol jetkizdik», deıdi E.Sadyqova.
Atyraý oblysy
