Atyraý oblystyq medısınalyq jedel járdem stansasy dırektorynyń orynbasary Nargız Abdrahmanovanyń málimetinshe, dıspetcherler pýltine júkti áıelden shaqyrtý túsipti. Soǵan baılanysty №9 brıgadanyń feldsherleri Elvıra Karımova men Qanat Jeksenbaev shaqyrtý berilgen mekenjaıǵa jetkende, júkti áıeldiń tolǵaǵy bastalǵan. Feldsherler júkti anany úıinde bosandyryp, egizdiń kindigin kesti. Sodan soń oblystyq perınataldyq ortalyqqa jetkizdi.
Feldsher Elvıra Karımova jedel járdem stansasynda 11 jyldan beri jumys isteıdi. Al jas feldsher Qanat Jeksembaevtyń bul saladaǵy jumysyn bastaǵanyna bir jyldan asypty.
«Biz shaqyrtýmen naýqastardyń mekenjaıyna jıi baramyz. Birneshe júkti ananyń úıinde bosanýyna kómek berdik. Alaıda egizdiń úıde ómirge kelýi alǵash ret tirkelip otyr. Mundaı jaǵdaıda qobaljý bolady ǵoı. Degenmen júkti ananyń egiz qyzdy aman-esen bosanýyna atsalystyq. Birinshisiniń kindigin kesip bolǵan sátte, ekinshisi de ómirge keldi. Bul – 2024 jyldyń umytylmaıtyn erekshe oqıǵasy», deıdi E.Karımova.
Oblystyq densaýlyq saqtaý basqarmasy baspasóz qyzmetiniń málimetine súıensek, 42 jastaǵy áıel egizdi júktiliktiń 37-aptasynda ómirge ákelgen. Egiz qyzdyń salmaǵy birdeı emes. Biriniń salmaǵy – 2061, ekinshisiniń salmaǵy 2272 gramm. Bi-raq ekeýiniń boıy birdeı – 47 sm.
«Egizdiń anasy buǵan deıin 5 balany bosanǵan. Endi onyń otbasy taǵy 2 sábımen tolyǵyp otyr. Qazir egiz sábıdiń de, anasynyń da jaǵdaıy jaqsy, olardyń ómirine tónip turǵan qaýip joq. Ázirge dárigerlerdiń jiti baqylaýynda bolady», dep málimdedi basqarmanyń baspasóz qyzmetinen.
Atyraý oblysy
