Sýret: el.kz
Sonyń ishinde ózim uzaq jyl qyzmet etken bilim salasyna qatysty keıbir derekterdi aıta keteıin. El Prezıdenti bıýdjettik qarjynyń basym bóligi mektepter, emhanalar men mańyzdy ınfraqurylym nysandaryn salýǵa, ózge de áleýmettik mindetterdi oryndaýǵa jumsalatynyn jetkizdi.
«Áleýmettik ınfraqurylymdy damytý máselesine de basa nazar aýdarylady. Aýyldaǵy densaýlyq saqtaý júıesin jańǵyrtýǵa arnalǵan ulttyq jobanyń aıasynda aýyldyq jerlerde medısına nysandaryn salý jumystary jalǵasady. Elimizde 460 myń oqýshyǵa arnalǵan 217 jaıly mektep salý josparlanǵan. Onyń 105-iniń qurylysy aıaqtaldy. Maqsatymyz – apatty jaǵdaıdaǵy jáne úsh aýysymmen oqytatyn mektepter máselesin, sondaı-aq mekteptegi oryn tapshylyǵyna qatysty túıtkilderdi tolyǵymen sheshý. Bir aı buryn 2025–2027 jyldarǵa arnalǵan Respýblıkalyq bıýdjet qabyldandy. Qujatta áleýmettik baǵyt basty basymdyq retinde saqtaldy. Onda densaýlyq saqtaý, bilim berý salasyna jáne áleýmettik qajettilikterge óte qomaqty qarjy qarastyrylǵan», dedi Prezıdent.
Jyl saıyn bıýdjetti josparlaý, bıýdjettiń iske asyrylýy jóninde mınıstrlikter jeke-jeke kelip esep bergende, biz Ata zańymyzda atap aıtylǵandaı, «Áleýmettik memleket» ekenimizge kózimiz anyq jetedi. Bul rette 2024–2025 jyly bilim berý salasynda naǵyz serpilis bolǵanyn, 460 myń oqýshyǵa eseptelgen 217 jańa jaıly mekteptiń qurylysy josparlanǵanyn atap ótý kerek. Osy aýqymdy jobany iske asyrý úsh aýysymda oqytý, tozyǵy jetken mektepter máselesin túbegeıli sheshýge, sondaı-aq oqýshylar orny tapshylyǵyn joıýǵa múmkindik beredi. Bilim berý ınfraqurylymyn damytýda qalaǵa da, aýylǵa da birdeı kóńil bólinip, sapaly orta bilim alýǵa qoljetimdilikti qamtamasyz etedi. Qazirgi ýaqytta 254 myń orynǵa arnalǵan 105 jaıly mekteptiń qurylysy aıaqtaldy, onyń 36-sy aýyldy jerlerde ornalasqan.
Jalpy, Memleket basshysynyń jyl basynda dál osylaı túıtkildi máselelerdi qamtyp suhbat berýi jaqsy úrdiske aınalyp, tıimdiligin dáleldep otyr. Keń kólemdi áńgime barysynda ishki saıasattyń aldaǵy jylǵa josparlanǵan negizgi jumystary aıqyndalǵan. Bıliktiń elimizdi odan ári damytýǵa qatysty ustanyp otyrǵan naqty baǵyt-baǵdary kórsetilgen. Atqarýshy memlekettik organdar men qoǵam birlese jumys istese, kózdelgen josparlar tıimdi nátıje beredi dep sanaımyz.
Nurgúl TAÝ,
Májilis depýtaty
