Foto: senate.parlam.kz
Máýlen Áshimbaev depýtattardyń óńirlerde azamattarmen kezdesýler ótkizip, suhbattyń negizgi oılaryn halyqqa jetkizýge úles qosqanyn atap ótti.
«Memleket basshysy suhbatta 2024 jyly ár sala boıynsha atqarylǵan jumystardy qorytyndylap, aldaǵy basym baǵyttardy belgilep berdi. Sondaı-aq, byltyr Parlament qabyldaǵan zańdardyń mańyzdylyǵy da erekshe atalyp ótildi. Jalpy, Prezıdentimizdiń barlyq bastamalary men reformalarynyń strategııalyq maqsaty – egemendigimizdi jáne ekonomıkamyzdy odan ári nyǵaıtý», dedi Senat Tóraǵasy.
Onyń pikirinshe, suhbatta elimizdiń áleýmettik-ekonomıkalyq damýyna qatysty mańyzdy saýaldarǵa jaýap berilip, memlekettik saıasattyń negizgi baǵyttary aıqyndaldy.
«Syrtqy saıasat pen halyqaralyq yntymaqtastyq máseleleri de nazardan tys qalǵan joq. Sonymen qatar, Prezıdentimiz qoǵamda qyzý talqylanǵan ózekti máselelerdiń túıinin tarqatyp, olar boıynsha óz ustanymyn bildirdi. Mundaı ashyqtyq pen dıalog jáne azamattardyń talap-tilekterine jedel nazar aýdarý – «Zań men tártip» qaǵıdattaryna taban tiregen Ádiletti Qazaqstannyń jarqyn kórinisi ekeni sózsiz. Osy rette, Prezıdentimizdiń bastamasymen qolǵa alynǵan reformalardy zańnamalyq turǵydan qamtamasyz etý asa mańyzdy ekenin taǵy bir atap ótken jón», dedi Máýlen Áshimbaev.
Máýlen Áshimbaev aldaǵy ýaqytta ekonomıkamyzdy damytýǵa jáne halyqtyń ál-aýqatyn arttyrýǵa arnalǵan birqatar mańyzdy zańdar qaralatyn tilge tıek etti.
«Olardy sapaly pysyqtap, ýaqtyly qabyldaýymyz qajet. Jalpy, Memleket basshysynyń Parlamentke artqan joǵary senimin aqtap, eldik múdde jolynda aıanbaı eńbek etýmiz kerek. Osy jolda bárimiz birlesip, nátıjeli jumys isteımiz dep senemin jáne aldaǵy qyzmetterińizge sáttilik pen tabys tileımin!», dep sózin qorytyndylady Senat Tóraǵasy.
