Foto: Almaty akimdigi
Qala ákimi Erbolat Dosaevtyń tapsyrmasy sheńberinde salynǵan atalǵan pýnkt Almatyda táýligine 1200 tekshe metr qardy qaıta óńdeýge qaýqarly eken.
Almaty ákimdiginiń baspasóz qyzmetiniń málimetinshe Qazaqstanda alǵash ret munda qardy eritý úshin aǵyndy sýlardyń jylýyn paıdalanatyn ınnovasııalyq tehnologııa qoldanylyp otyr.
Erigen sý qum men qoqystan súzgileý arqyly tazartylady, sodan keıin qalanyń káriz júıesine jiberiledi. Qar eritý pýnktine Áýezov, Almaly, Bostandyq aýdandarynan qar ákelinedi. Atalǵan aýdandarda qar úıindisi máselesi ózekti, qozǵalys qıyndaǵan ortalyq kóshelerden aq ulpany syrtqa shyǵarý qıyn.
Mamandardyń pikirinshe, mundaı sheshim qardy tıimdi túrde kádege jaratyp qana qoımaı, qala ınfraqurylymyna túsetin júktemeni edáýir azaıtýǵa múmkindik beredi.
