Foto: freepik.com
2030 jylǵa deıin elimizde kólik ınfraqurylymyn jaqsartý boıynsha aýqymdy joba júzege asyrylady. Búginde jańa avtojoldardyń jalpy uzyndyǵy – 4,7 myń shaqyrym, onyń 3,7 myń shaqyrymy – I sanattaǵy joldar. Sonymen qatar bıylǵa mynadaı aýqymdy jobalar josparlanǵan: Qyzylorda – Jezqazǵan (208 km), Aqtóbe – Ulǵaısyn (234 km), Qaraǵandy – Jezqazǵan (572 km), Saryaǵash qalasy aınalma joly (102 km), Qyzylorda qalasy aınalma joly (20 km), Qyzylorda – Sekseýil (470 km), Atyraý – Dossor (86 km), Rýdnyı qalasy aınalma joly (16,9 km), Jańaózen – Kendirli (156 km), Petropavl qalasy aınalma joly (8 km), Túrkistan qalasy aınalma joly (29,6 km), Astana – Qostanaı – RF-men shekara (830 km), Shymkent qalasy aınalma joly (48 km), Atyraý – Oral (ortasha jóndeý, 516 km), Atyraý – Shapaı (136 km), Almaty – Talǵar – Báıdibek bı (68 km), Almaty – Úshqońyr (48 km), Beıneý – Sekseýil (736 km) jáne Jaıyq ózeni arqyly ótetin kópir (6,5 km). Bul jobalardy iske asyrýǵa jalpy kólemi 9 trln-nan asa teńge ınvestısııa kózdelgen. Qazir ınvestor tartý jumysy belsendi júrgizilip jatyr.
Temirjol kóligi salasynda da birqatar aýqymdy jańǵyrtý josparlanǵan. 2025 jyly 225 jańa vagon satyp alynady. «Dostyq – Moıynty» jobasy boıynsha temirjol qurylysy aıaqtalady, bul ótkizý qabiletin 5 ese arttyryp, táýligine 12-60 poıyz jubynyń úzdiksiz qozǵalysyn qamtamasyz etedi. Sonymen qatar «Almaty aınalma joly» jobasy júzege asyrylady. Sondaı-aq «Dostyq – Beskól» jáne «Moıynty – Balqash» ýchaskelerinde qozǵalys ashý josparlanǵan. Bul sheshim kórsetilgen ýchaskelerdegi poıyz qozǵalysyn jaqsartýǵa jáne júk tasymaly máselelerin sheshýge kómektesedi.
Teńiz kóligin damytý maqsatynda Aqtaý portynda konteınerlik hab salý jumystary bastaldy, bul porttyń ótkizý qabiletin jylyna 240 myń JFE-ge deıin arttyrady. Bul Qazaqstannyń halyqaralyq logıstıkadaǵy ornyn nyǵaıtyp, Ázerbaıjan, Grýzııa jáne Túrkııa arqyly ótetin Transkaspıı baǵytyndaǵy konteınerler tasymaly kólemin ulǵaıtýǵa, sondaı-aq Qytaıdan Eýropaǵa jetkiziletin tranzıttik júkterdiń bir bóligin qaıta baǵyttaýǵa múmkindik beredi. Sonymen qatar portta tereńdetý jumystaryn júrgizý josparlanǵan. Bul onyń termınaldyq qýaty men konteınerlerdi tasymaldaýdyń tıimdiligin ulǵaıtady.
