Infografıka jasaǵan – Záýresh SMAǴUL ,«EQ»
Halyq únine qulaq asatyn memlekettiń jaýapkershiligi – tek bıliktiń emes, barshamyzdyń paryzymyz. Ádilettilik turǵyda árbirimizdiń sana-sezimimiz, isimiz, qundylyqtarymyz, oıymyz elimizdiń múddesi jolynda toǵysqanda táýelsizdigimiz nyǵaıa bermek. Biz koronovırýs indetinen beri birneshe kúrdeli daǵdarys jaǵdaılaryn oń sheshe aldyq. Olardyń barlyǵy eńsesimizdi túsirmeı, qataıa túsetinimizdi kórsetti, halqymyzdy biriktire tústi. Árbir kókiregi oıaý sanaly azamattar bul sharalardan tys qalǵan joq. Mysaly, Prezıdent byltyrǵy sý tasqyny saldarynan qandaı sabaq alynyp, jasalyp jatqan mańyzdy is-sharalarǵa toqtaldy. Is-sharalardyń qatarynda sý resýrstaryn basqarý tujyrymdamasy, ony oryndaýdyń keshendi jospary bar. Qazaq ulttyq sý sharýashylyǵy jáne ırrıgasııa ýnıversıteti ashyldy. Qazir Parlamentte Sý kodeksi qaralyp jatyr. Memleket basshysy ár qıyndyqtyń qaıyry bar dep, ár nársege baıbalam salmaı, baıypty bolýǵa shaqyrady.
Prezıdent suhbatynda: «Byltyrǵy tasqyn elimiz úshin zor synaq boldy. Mundaı alapat tasqyn Qazaqstanda buryn bolmaǵan. Memleket orasan zor qaýiptiń betin qaıtarý úshin shuǵyl sharalar qabyldady», dep atap ótken eken. Sol turǵyda sý tasqyny saldarynan múlki zaqymdanǵan azamattarǵa jan-jaqty kómek kórsetildi. О́ńirlerde turǵyn úıler, áleýmettik nysandar, ınfraqurylymdar salý, qalpyna keltirý jumystary qyzý júrgizildi. Aıtalyq, Úkimettiń resmı derekterine súıensek, 36 455 otbasyna jalpy somasy 13,3 mlrd teńge, 100 AEK mólsherinde birjolǵy áleýmettik kómek kórsetildi. 21 876 otbasyna 9,9 mlrd teńge kóleminde 150 AEK-ke deıingi ótemaqy tólendi. Tótenshe jaǵdaı jarııalanǵan aımaqtarda ataýly áleýmettik kómek berý otbasylardyń materıaldyq jaǵdaıyn jergilikti komıssııanyń tekserýinsiz, avtomatty túrde III toqsanǵa uzartyldy. Nátıjesinde, 3,6 myń otbasyna 655,7 mln teńge kólemindegi AÁK tólemi taǵaıyndaldy. Sý tasqynynan zardap shekken óńirlerde komıssııalar azamattardyń jalǵyz baspanasy bolǵan 19 359 sý basqan úı men saıajaı qurylystaryn tekserdi. Turǵyndardy baspanamen qamtý maqsatynda jyljymaıtyn múlik naryǵynan 5 767 turǵyn úı satyp alyndy. Jóndeý jumystary 9 156 úıde 100% aıaqtaldy. Bul maqsatta barlyǵy 54,7 mlrd teńge bólindi. Sondaı-aq qysqa merzimde 64 mlrd teńgege 2 680 jeke turǵyn úı salyndy. Bir sózben aıtqanda, qyzyl sýdan zardap shekken otbasylardyń barlyǵy da kómek-qoldaýsyz qalmady. Mine, osynyń bári – birligi bekem eldiń tirligi.
Naýryzbaı BAIQADAMOV,
Senat depýtaty
