Ýnıversıtette oqyp júrgeninde jazǵan alǵashqy áńgimelerinen-aq ádebıetke aıtary bólek, sóz saptasy erek qalamgerdiń kelgeni belgili boldy. Birtýar ustazy, professor Beısembaı Kenjebaevtyń jetekshiligimen handyq dáýirdegi jyraýlar poezııasy týraly ǵylymı jumysyn sansyz kedergilerge qaramastan, dittegen jerine jetkizýi jas ǵalymnyń boıyndaǵy jasymas jiger-qaıratty kórsetse kerek.
Aınalasynan at ozdyrǵan abzal aǵamyz qolynan qalamy túskenshe Alash muratynan aınyǵan joq. Barlyq shyǵarmalarynda ultyn ulyqtap, dástúr-saltyn dáriptedi. Oqyrmannyń orasan zor rýhanı oljasyna aınalǵan «Qobyz saryny», «Aldaspan», «Kókmunar», «Alasapyran», «Shaqan-Sheri», «Sary qazaq», «Tazynyń ólimi», «Kókbalaq», «Jarmaq», «Shyńǵys han jáne onyń zamany», «Altyn Orda», «Men», «Qazaq tarıhynyń álippesi» sııaqty kesek týyndylary osy sózimizdi aıǵaqtaı túseri anyq.
Qalyń eli qazaǵyna qyzmet qylýdy basty murat-múddesine balaǵan zańǵar qalamgerdiń ónegeli ómir joly egemen elimizdiń erteńi sanalatyn keıingi tolqyn ókilderine úlgi bolýǵa ábden laıyq. Ultyn ushpaqqa shyǵarýǵa umtylýdan sharshamaǵan uly Muhańnyń esim-soıy eshqashan umytylmaq emes. Janyńyz jánnatta bolsyn, ult joqshysy! Murańyz halyqpen birge jasaı beredi, rýhanııat abyzy!
«Egemen Qazaqstan» qalamgerleri
