Sýret: astanatv.kz
Tarıhqa «alpysynshy jylǵylar» degen qanatty uǵymmen engen tańǵajaıyp talantty býynnyń kórnekti ókilderiniń biri bolǵan, keskini men kelbeti jarasqan, sheshen tildi, kósem minezdi, oıy men boıynan bilim men bilik ańqyp turǵan jigit aǵasyn alǵash kórgenim esimde. Júris-turysyna qarap, áldebir Batys romandarynyń erýdıt keıipkerleriniń birin kórgendeı kúı keship em… Alǵashqy sezim aldamapty… «Qobyz sarynyn», «Bir atanyń balalary» men «Tazynyń ólimin» oqyp súıindim… «Kók munardy» oqyp tańyrqadym!.. Muhtar Maǵaýın meniń rýhanı keńistigime solaı endi. Jazýshylar odaǵynda birge qyzmettes boldyq. О́tpeli dáýirdiń san taraý qıyndyqtary men hıkmetterin de birge júrip atqardyq. Bólistik. Muhań ustanymyna berik, tirshiliktiń usaq-túıek áńgimesine ýaqyt óltirmeıtin naǵyz kásibı jazýshy edi.
Álemniń arǵy sheti men bergi shetin Sóz deıtin uly ónermen ǵana ólsheıtin. Qazaqtyń uly tarıhyn dál Muhtar Maǵaýındeı saralap, taldap, jerine jetkize tanıtyn adam jazýshy deıtin qaýymda sırek edi.
Ol sózdi qazaqtan, qazaqty ádebıetten bólgen joq. Myna jalǵannyń qyzyǵy men qýanyshyn, qaıǵysy men qasiretin sóz deıtin jumbaǵy men syry mol álemmen qalaı ólshese, baqı deıtin beımálim álemge de sol sóz óneriniń máńgiligin arqalap, uzap barady.
Janyńyzǵa meken jánnat tórinen buıyryp, rýhyńyz peıishte shalqysyn, halqyna qadiri asqan, sózdi álemniń kindigi sanaǵan qaıran Muha! Qosh, sýretker!
Nurlan ORAZALIN,
Memlekettik syılyqtyń laýreaty
