Sýret: qazaquni.kz
Aıaýlymnyń ákesi Serik Ámirenov pen anasy Gaýharııa Keńesbekqyzy – Zaısan aýdanynyń týmasy. Keńesbektiń týǵan aǵasy, jazýshy Keńeshan Zákenov – qazaq baspasóziniń qara shańyraǵy «Egemen Qazaqstan» gazetiniń ardageri. Ata-anasy Aıaýlymdy tórt jasynan frıstaıldyń mogýl túrine beredi. Bul – óte kúrdeli sport. Bıik taýdan tómen qaraı zymyrap, kedergilerden sekirý ońaı sharýa emes. Alaıda qaısar qyz bárine shydady. Birde ákesi, birde anasy О́skemen qalasynan 15 shaqyrym jerdegi jattyǵý alańyna erinbeı-jalyqpaı aparyp júrdi.
«Aıaýlym sábı kezinen ójet, alǵyr boldy. Bı, sportty erekshe unatatyn. «Flesh» degen bı tobyna qatysty. Tórt jasynan frıstaıl seksııasyna jazyldy. Dombyra shertedi, mýzykaǵa qumar, aǵylshyn tilin erkin meńgerip aldy. Frıstaıl – qazaq qyzdaryna tosyn sport túri. Alǵashqy bapkeri Sergeı Aksenovke myń alǵys, odan keıingi ustazy V.Sokolov, elimizdiń jastar quramasynyń aǵa jattyqtyrýshysy Vıktor Reıherd te Aıaýlymnan úmit kútti, árdaıym jeńiske jigerlendirip otyrdy. Aıaýlymnyń jetistikteri – osy ustazdarynyń eńbegi», deıdi ákesi.
2013 jyly Eýropa chempıonatynda Aıaýlym úsh birdeı júlde – altyn, kúmis, qola medal jeńip aldy. Budan keıin de túrli dúbirli jarysta el namysyn abyroımen qorǵady. 2018 jyly Koreıanyń Phenchhan qalasynda jalaýy jelbiregen Qysqy olımpıada oıyndarynda júldege iline almasa da, jarystan shyǵyp qalǵan joq, alǵashqy jıyrmalyqqa ilindi. Tórt jyldan keıin Beıjińdegi aq Olımpıadaǵa da qatysyp, sheberligin shyńdaı tústi. Eki Olımpııa oıyndarynda, álem kýbogi, birneshe halyqaralyq jarysta jaqsy óner kórsetken Aıaýlymnan ata-anasy, qazaq jurty jeńis qana kútedi.
«Aıaýlym mektepti, qazaq ulttyq sport akademııasynyń magıstratýrasyn úzdik bitirdi. Sodan soń Ál-Farabı atyndaǵy memlekettik ýnıversıtettiń doktorantýrasyna tústi. Sport pen oqýdy birge alyp kele jatqan qyzyma rızamyz. Týrın tórindegi jarysta jeńiske jetedi degen úmittemiz», deıdi S.Ámirenov.
Ońdasyn ELÝBAI,
«Egemen Qazaqstan» gazetiniń ardageri
