Kollajdy jasaǵan – Záýresh SMAǴUL ,«EQ»
Byltyr qolǵa alynǵan ınvestısııalyq joba kezeń-kezeńimen júzege asyp, 400 bas iri qaraǵa shaqtalǵan ferma qurylysy aıaqtaldy. Quryltaıshylar jobany tolyq aıaqtap shyǵý 700 mln teńge qarajat jumsady. Qazir kompanııa «Kókshe» áleýmettik-kásipkerlik korporasııasynan 1 mlrd 87 mln teńge nesıe alyp, ekinshi fermanyń qurylysyn bastap ketti. Jańa ferma da 400 basqa laıyqtalǵan.
Kásiporyn sút ónimderin óńdeýdi jolǵa qoıý úshin jańa tehnologııany paıdalanady. Tórt túlik maldyń tilin tabý jergilikti jurt úshin tańsyq sharýa emes. Al ónimin óńdeý – aıryqsha mańyzdy másele. Baǵzy zamandaǵydaı «qoıyn qurttap, aıranyn urttap» júre berýge bolmaıdy. Bar dúnıeni uqsata bilgen jón. Adyrly, tastaq, shóbi qunarly ólke qara mal úshin meılinshe qolaıly. Áıtse de, tyńǵa túren salǵan áne bir jyldary quıqaly óńirdiń quty qashqany da shyndyq. Sondyqtan mal azyǵyn meılinshe túrlendirip, mol daıyndamaı, qyr asý qıyndaı bermekshi. Máseleniń mánisin jaqsy túsingen seriktestik «sıyrdyń súti tilinde» ekenin jaqsy biledi. Mal baǵý ádisin de ǵylymı negizde jetildirip, tolymdy etip jatyr.
Seriktestik senimdi qadam jasap, aldyna bıik maqsat qoıyp otyr. Nátıjege qol jetkizetini de sózsiz. Sebebi seriktestik basshysy Erlan Alın iskerligimen tanylǵan azamat. Tájirıbeli basshy bilikti maman ǵana emes, týǵan jerdiń tútinin túzý ushyrýǵa aıanbaı atsalysyp júrgen janashyr jan. Jarqaıyńdyqtar úshin Erlan Alınniń janqııarlyq eńbegi ádemi úlgige aınalǵan. Bul tóńirekte sharýashylyq týraly suraı qalsańyz, halyqtyń deni osy seriktestikti maqtana aýyzǵa alary sózsiz. Aýa raıy kúrt ózgerip, keı jyldary qyryn qabaq tanytsa da, jurtty jaqsylyqqa bastap júr. Adal eńbekke uıymdastyryp, qajyr-qaıratyn bir arnada toǵystyra biletin jáne bolashaǵyn boljap, keleshegin kemel etýge tyrysatyn eńbekker jannyń beınesi naǵyz búgingi kúnniń qaharmany keıpinde. Bir qyzyǵy, seriktestik basshysynyń mamandyǵy ózge taraptan eken. Áýeli dene tárbıesiniń muǵalimi bolǵan, shańǵy sportymen belsendi aınalysqan. Áskerı boryshyn ótep kelgennen keıin jattyqtyrýshy bolyp eńbek etken. Álde qıyndyqtan qaıyspaý, jol-jónekeı kezdesken bógesindi buzyp-jaryp, alǵa umtylý sportta qalyptasqan minez be eken?
Áýeli «Saıan» sharýa qojalyǵyn qurypty. Maldy óz tólinen ósirip, qajetti tehnıkany jınaqtap, eskini jamap-jasqaǵan. Tórt qubylasyn túgeldegen soń «Temirlan» jaýapkershiligi shekteýli seriktestigin qurǵan. Búgingi bosaǵasyna bereke bitken ujymnyń alǵashqy bastaýy osylaı qalyptasqan. Keıin Erlan Qınýarbekuly istiń kózin taba bilgen ilkimdiliginiń arqasynda sharýasyn myǵymdaı túsken. Igiligin el kórip otyr. Seriktestik ónimderi sapasy jaǵynan joǵary baǵalanady. Tutynýshylar tarapynan ókpe-naz aıtylǵan emes.
Jalǵyz tórt túlik mal emes, tyń dala tósinde aqyq dán de ósiredi. Egistik alqaby 45 myń gektardy quraıdy. Keshegi keńes zamanyndaǵy eki keńshardyń jeri. Osynshama jerdi óńdeý úshin qýatty tehnıka, qajyrly jumys kúshi kerek ekeni belgili. Bolashaqtyń jaıyn oılaǵan sharýashylyq basshysy aýyl sharýashylyǵyna qajetti tehnıkany tolyq jańǵyrtqan.
«Temirlan» seriktestigi qazir beri qoıǵanda aýdandaǵy, ári qoıǵanda óńirdegi etek-jeńi keń pishilgen iri aýyl sharýashylyǵy kásiporny sanatynda. Seriktestik óz sharýasyn yjdaǵattaýmen qatar, aýdannyń áleýmettik-turmystyq jaǵdaıynyń jaqsarýyna kóp kómek kórsetedi. Eldi mekenderdiń jolyn jóndeýge, bilim jáne mádenı nysandardy jańǵyrtý jolynda da aıanyp qalǵan emes.
Bıyl tórt birdeı ınvestısııalyq jobany qolǵa alyp, júzege asyryp jatyr. Egin sharýashylyǵynda tabysqa qol jetkizý úshin 340 gektar alqapty sýarmaly egistikke kóshirý maqsatynda ıtalıandyq qurylǵy satyp alǵan. Jelilik elevatorǵa sapasy myqty túrik qurylǵysyn ornatqan. Shıyra aıtqanda, seriktestik tabysqa qol jetkizýmen qatar, óz aýylymen birge tutas aýdannyń da ahýalyn jaqsartýǵa septigin tıgizip keledi.
Aqmola oblysy,
Jarqaıyń aýdany
