Foto: polisia.kz
Jedel-izdestirý is-sharalary kesheni nátıjesinde on kılogramǵa deıingi marıhýanany Aqtaý qalasynda satýdyń kezeńdik syzbasy qujattandyryldy. Izdeý is-sharalary qalanyń ártúrli jerlerinde, páterlerde jáne adam turmaıtyn úı-jaılarda júrgizildi. Tárkilengen esirtkiniń jalpy salmaǵy 200 keliden asty. Kórsetilgen qalanyń tórt turǵyny jáne elimizdiń ońtústik óńiriniń bir turǵyny qamaýǵa alyndy.
«Osyndaı ádispen Almaty qalasy PD uıymdasqan qylmysqa qarsy kúres basqarmasynyń qyzmetkerleri de jedel ázirleme júrgizdi. Nátıjesinde ońtústik astananyń turǵyny ustalyp, onyń turǵylyqty jerinen asa iri kólemde mefedron jáne marıhýana tárkilendi», dedi IIM uıymdasqan qylmysqa qarsy kúres departamentiniń ókili Qýandyq Alpys.
Odan ári júrgizilgen is-sharalar barysynda Almaty oblysynda esirtki zerthanasy qyzmetiniń joly kesildi. Onda sıntetıkalyq esirtki óndirisinde paıdalanylatyn 600 lıtrden jáne 100 kg astam ártúrli prekýrsorlar tárkilendi. Osylaısha 100 kg astam sıntetıkalyq esirtkini daıyndaýǵa jáne satýǵa jol berilgen joq.
«Jedel is-sharalar jalǵasýda, atalǵan faktilerge qatysy bar basqa da adamdar anyqtalyp jatyr. Osy baǵyttaǵy jumys Ishki ister mınıstrliginiń erekshe baqylaýynda», dedi Qýandyq Alpys.
