Kollajdy jasaǵan – Záýresh SMAǴUL ,«EQ»
Kitap sońyndaǵy túsiniktemede mátindi erterekte Sadyq Qasımanov Abaı eliniń turǵyny Qorymjan Jigitekovtiń aýzynan jazyp alǵan delinipti. Qorymjan uly aqynnyń atshysy eken. Biraq týystyq jaǵynan Bazarálige jaqyn. Sol jyldary Abaı men Bazaráli arasynda túsinispeýshilik týyp, tobyqty jurty ekiudaı kúıge túsedi.
Bir kúni Bazaráli shonjar rýlasy Qorymjanǵa sálem aıtady. «Meniń súıegimdi jasytyp, týysymdy qorlap, Abaıdyń qorasynyń shetinde otyrmasyn, kóship kelsin. Eger de jaýmen birge jaý bolam dese, otyrsyn. Onda tiri bolam dep oılamasyn!» depti.
Bul habardy estigen Qorymjan bir jaǵynan Bazaráliden qorqyp, ekinshi jaqtan aǵaıynǵa shet bolmaıyn dep, Abaı bir jaqqa kete qalǵan sátti paıdalanyp, bir túnde qashyp kóshedi.
Qorymjan budan buryn aýyldasy Aqberdi degenniń bir atyn surap minip, onymen toqtamaı shaýyp, aqyry ábden boldyrtyp, óltirip alǵan eken. Iаǵnı Aqberdige bir at qaryz. Qorekeń keterinde artymda sóz qalmasyn dep oǵan astyndaǵy atyn berip ketedi. Biraq asyǵyp júrip «atymnyń qunyn aldym» dep, qolhat alýdy umytady.
Arada taǵy bir jyl ótedi. Eki aýyl arasynda arazdyq tipti órshı túsedi. «Bul oqıǵanyń dál ortasynda júrdim. Tipti Abaıǵa qolymnan keler qastyǵymdy aıamadym», degen eken Qorymjan. Aqyrynda Bazaráli aıdalyp ketedi.
Taǵy birer jyl ótken soń, tobyqty elinde sıez ashylady. Ol tus – el ishindegi bıler bedeli áli joıylmaǵan zaman. Qara halyq bir-birinen kórgen qorlyq-zorlyǵyn ortaǵa tastap, kesim tyńdap, jurt abyr-sabyr. Jıynnyń bas alqasy – Abaı. Mańaıyna jurt jaqsylaryn jınap, dúken quryp otyr.
Bir zamanda Qorymjanǵa «Bıler shaqyryp jatyr, ústińnen aryz tústi» degen habar jetedi. Barsa, shart júginip Aqberdi otyr. «Ne boldy?». «Sen atymdy óltirip, qunyn tólemeı ketkensiń». Qorymjanda ózin aqtap alatyn dálel joq. Kezinde qolhat almaǵan. Jypylyqtap Abaıǵa qaraıdy.
Qorymjan keterinde attyń qunyn tólegenin Abaı biledi eken. Aqberdige «Uıatyń qaıda?» dep ursyp daýdy toqtatady da, azdan soń qolyna qaǵaz-qalam alyp birdeńe jazady. Ol eki shýmaq óleń eken. Kópshilikke oqyp beredi.
Quıryǵy – shaıan, beti – adam,
Baıqamaı senbe qurbyǵa.
Syrty – jylmań, ishi – aram,
Kez bolar qaıda sorlyǵa, –
dep bir toqtaıdy da, Qorymjanǵa qarap:
Dosyńa dostyq – qaryz bil,
Dushpanyńa ádil bol.
Asyǵys túbi – ókinish,
Oılanyp almaq sabyr sol, – depti.
