Júzden – júırik, myńnan – tulpar

Bıyl Jambyl oblysynyń oqýshylary úshin óte tabys­ty jyl boldy. Olar bıylǵy oqý jylynda halyqaralyq, respýblıkalyq olımpıadalar men ǵylymı jarystarda 133 medaldi ıelendi. Onyń ishinde 51 medaldi halyqaralyq bilim jarystarynda alypty. Respýblıkalyq pán olımpıadasy men ǵylymı joba jarysynda oblys komandasynyń júldeli I oryndy ıelenýi – jambyldyq daryndy oqýshylarǵa berilgen laıyqty baǵa ekeni anyq. Osy aptada Jambyl obly­synyń ákimi Kárim Kókirekbaev halyqaralyq, respýblıkalyq olımpıadalar men ǵylymı jarystardyń jeńimpazdarymen kezdesip, keń otyryp áńgimelesti. Bıylǵy jylǵy halyqaralyq olımpıadalarda jeńis tuǵyrynan kóringen daryndy balalar ishinen ásirese, qazaq-túrik mektep-ınternatynyń oqýshysy, Máskeý qalasynda ótken Halyqaralyq Mendeleev olımpıadasynyń qola medaliniń ıegeri atanǵan Ámzebek Azamatty, matematıka páninen Afıny qalasynda ótken Balqan olımpıadasynda qola medal, halyqaralyq Jáýtikov olımpıadasynda kúmis medalǵa ıe bolǵan Ábesbek Danııardy, sondaı-aq, osy olımpıadada fızıka páninen kúmis medaldi ıelengen Segizbaı Aıandy, matematıka páninen halyqaralyq Azııa-Tynyq muhıty olımpıadasynyń kúmis medaline qol jetkizgen Dinmuhammed Túzelovti erekshe maqtanyshpen aıtýǵa bolady. Al halyqaralyq «Ǵylym álemin ashamyz» atty ǵylymı jarysta ekinshi oryndy ıelengen Taraz qalasyndaǵy №1 gımnazııanyń túlegi, «Altyn belgi» ıegeri Seısenǵalı Márııam keshe ǵana ótken UBT-da 119 balldy ıelenip, óz bilimin taǵy da dáleldedi. Ulttyq biryńǵaı testileýde eń joǵarǵy 125 ball alǵan Qazaq­stan boıynsha bes túlektiń bireýi – Taraz qalasyndaǵy №45 gımnazııanyń oqýshysy Gúlnaz Erdosova oblys abyroıyn ósirip, jambyldyqtardy zor qýanyshqa bóledi. Bıylǵy jylǵy testileýde mektep túlek­teri ótken jylǵa qaraǵanda, ózderiniń jaqsy daıyndyqtaryn kórsetti. Oblystyń ortasha bally 78,6-ny qurap, 2014 jylmen salystyrǵanda 6,2 ballǵa ósti. «Ustazdyq etken jalyqpas, úıretýden balaǵa», dep uly Abaı atamyz aıtqandaı, ustazdyq  qıyn da jaýapty, qyr-syry mol, shyǵarmashylyq eńbek. Bul – bir jaǵynan úlken abyroı, ekinshi jaǵynan joǵary jaýapkershilikti talap etedi. Sondyqtan da biz­diń elde ustaz qasıetti tulǵa retinde erekshelenedi. Qazirgi tańda oblys túlekteri álemniń túkpir-túkpirindegi eń úzdik joǵary oqý oryndarynda bilim alýda. Bul, árıne, eń aldymen ustazdardyń tynymsyz eńbeginiń jemisi. Sodan bolar Jambyl oblysynyń ákimi K. Kókirekbaev bul jıynda oqýshylarmen qatar birqatar ustazdardy marapattap, qurmet kórsetti. – Daryndy jastar – ult bo­la­shaǵy. Elbasy N.Nazarbaev «Men jańa býyn qazaq­stan­dyq­tarǵa senim artamyn. Sizder Jańa baǵyttyń qozǵaýshy kú­shine aınalýǵa tıissizder», dep  jastarǵa úlken senim artty. Osy jas órender bilimdi, tárbıeli bolsa – elimizdiń erteńi myqty bolady, – deıdi K.Kókirekbaev. Mine, osylaısha jambyldyq órender bilim saıystarynda júzden – júırik, myńnan – tul­par shyǵyp, ózderiniń básekege qabilettilikterin tanytty. Oralhan DÁÝIT, «Egemen Qazaqstan». Jambyl oblysy. Sýretti túsirgen Aqádil RYSMAHAN.