Árbir toǵyzynshy bala Almatyda ómirge keledi

Osy aptada ońtústik astanada da «Mereıli otbasy» jalpyult­tyq baıqaýy qalalyq kezeńiniń qorytyndysy shyǵaryldy. Baıqaý barysynda úsh otbasy jeńim­­­paz atandy. Olar – UOS arda­ger­leri Kalınınderdiń otbasy men Dýdaevtardyń medısınalyq áýleti jáne kópbalaly Qadyrovtar. Úlgili otbasylardy marapat­taý saltanatyna Almaty ákimi Ahmetjan Esimovtiń ózi kelip, qyzyqty sharaǵa qoǵamdyq uıymdardyń, otbasylardy áleý­mettik qoldaý birlestikteri men daǵdarystar ortalyqtarynyń ókilderi qatysty. Megapolıs basshysy mem­le­kettiń múddesimen qolǵa alynǵan osynaý baıqaýdyń máni jaıly sóz qozǵady. Ákim árbir jannyń óz sha­ńyraǵynda adamgershilik qa­sıetterdi ustanyp, neke ómir­sheń­digin úlgi etýi, dástúrlerdi syı­laýy – jalpy otbasynyń márte­be­sin art­tyrýda barynsha mańyz­dy ári kó­keıkesti ekendigin atap ótti. «Osynaý otbasylyq fes­tı­val­diń mańyzy óte zor. Bıyl byltyrǵy baıqaýǵa qaraǵanda eki ese kóp otbasylar qatysty. Jarysqa qatysyp otyrǵan otbasylardyń barlyǵy túrli kásiptiń, etnostyń jáne eńbegimen abyroıǵa bólengen áýlettiń ókilderi», – dedi Ahmetjan Esimov. Memleket otbasylarǵa jan-jaqty qoldaý kórsetýde. Náres­te ómirge kelgen kezde bir rettik járdem aqsha jáne bala bir jasqa tolǵansha áleýmettik járdem kórsetiledi ári kópbalaly analar da járdem aqsha alady. «Qoljetim­di baspana-2020» memlekettik baǵdarlama aıasynda Almatyda 800-den astam kópbalaly jáne jas otbasy ózge de áleýmettik jaǵynan qorǵalatyn turǵyndarmen birge páter kiltterin aldy. Qala basshysy jeńimpaz otbasylaryna júldelerin tapsyrý barysynda Almatydaǵy otbasylyq-demografııalyq jaǵdaıdyń oń dınamıkasyn atap ótti. Mysaly, sońǵy 5 jyl ishinde megapolıs turǵyndarynyń ortasha ómir súrý jasy 4 jylǵa artyp, 74,6 jasty quraǵan (erler – 70,2, áıelder – 78,3). Dúnıe esigin ashyp jatqan sábı­lerdiń ósý dınamıkasy da turaq­ty. Mysaly, ótken jyly Almaty­da 42 myń náreste dúnıege kelgen, bul – elimizdiń árbir toǵyzyn­shy balasy. Ana ólimi 6 ese, al sábı ólimi 2 ese tómendegen. Aınash ESALI, «Egemen Qazaqstan». ALMATY.