Kollajdy jasaǵan – Qonysbaı ShEJIMBAI, «EQ»
Sońǵy 3 jylda oblystyq bıýdjetten memlekettik tapsyrys aıasynda shyǵarmashylyq úıirmeler men sporttyq seksııalarǵa 11,6 mlrd teńge bólinip, ıgerilipti. Osy qarjyny jumsaǵandar arasynda shyǵarmashylyq úıirmelerdiń úlesi basym. Baǵdarlama aıasynda jumys isteıtin kásipkerlerdi tekserýdi qarajat kóp bólingen Qyzylorda qalasy, Shıeli, Jańaqorǵan, Syrdarııa aýdandarynan bastaǵan top biraz bylyqtyń betin ashty.
Tekserý kezinde basyndaǵy úıin – úıirme, aýlasyndaǵy saraıyn – seksııa retinde tirkep, aqsha alyp kelgender anyqtalypty. Tipti, qaǵazda bar úıirmege 200 shaqyrym qashyqtaǵy ózge aýdan oqýshylaryn, basqa oblystaǵy balalardy «qatystyryp» qoıǵandar da bar. Bir balanyń birneshe kásipkerdiń esebinde júrgeni óz aldyna bólek áńgime.
Top ókilderi Jańaqorǵan aýdanyndaǵy 19 kásipkerdiń jumysyn saralap, olardyń 127,2 mln teńge memleket qarajatyn zańsyz ıemdengenin anyqtady. Onyń 106,1 mln teńgesi mádenıetke, al 21,1 mln teńgesi sport salasyna tıesili bolyp otyr. Osy basqarmalar basshylary 125 kásipkermen kelisim-shartty birjaqty buzyp, onyń ishinde 55 kásipker jumysyn toqtatty. Qazir olardyń qýlyqpen qaltaǵa basqan qarajaty qaıtarylyp jatyr.
«Prokýratýra kásipkerler quqyǵyn qorǵaıtyn basty organnyń biri. Biz olardyń jolyndaǵy túrli kedergilerdi joıýǵa kúsh salyp kelemiz. Biraq memleket qarjysyn túrli aıla-sharǵymen ıemdenbek bolǵandarǵa tosqaýyl qoıýǵa tıispiz. Mysaly, tekserý kezinde Shıeli aýdanynda burynǵy mektep dırektorynyń balalarynyń atyna tirkelgen mekemeler arqyly memlekettik sporttyq, shyǵarmashylyq tapsyrysqa jalǵan qujattar usynyp, bıýdjetke 13,3 mln teńge shyǵyn keltirgeni belgili boldy. Jalpy, úıirmelerge qatyspaǵan 2 myńnan astam bala anyqtaldy. Sonyń kesirinen bıýdjet qarjysyn maıshelpek qylǵysy kelgender memleketke 450 mln teńgege jýyq zalal keltirgen. Búgingi kúnge kásipkerler 48 mln teńgeni qaıtardy», deıdi oblys prokýrory Rızabek Ojarov.
«Damý bala» platformasyna tirkelgender arasynan 5 740 balanyń ata-anasy tizimdegilerdiń shyn máninde shyǵarmashylyq úıirmeler men sporttyq seksııalarǵa qatyspaıtynyn rastap otyr. Jalpy, ónim berýshiler tarapynan 13 731 bala tizimnen alynyp tastaldy. Osyndaı faktilerge baılanysty Qyzylorda oblysy boıynsha sybaılas jemqorlyqqa qarsy qyzmeti Qylmystyq kodekstiń 190-baby boıynsha sotqa deıingi tergep-tekserýdi bastady.
QYZYLORDA
