«Kókshetaý» memlekettik ulttyq tabıǵı parkiniń ujymy jazda 282 tonna shóp, 256 294 dana buta býmasyn, 349,6 tonna jem, 12,51 tonna tuz daıyndaǵan bolatyn. Park aýmaǵyndaǵy alańqaılardy qar basyp, qystyń basynda qar aralas jańbyr jaýyp, tabıǵı qorekti tabý qıynǵa aınalǵan tusta tirnektep jınaǵan qor qajetke jarady. Qarashanyń 15-inen bastap park aýmaǵyndaǵy buǵy, maral, elik, teńbil buǵy, sibir eligi tárizdi ańdar qorektendirile bastady. Park ujymy jaz boıy jınaǵan jem-shóp qory kógerip kóktem shyqqansha ábden jetedi.
– Jyl saıyn osyndaı sharýa atqaramyz, – deıdi parktiń bas dırektory Erbol Saǵdıev. – Byltyrǵy qıyn qystan da shyǵynsyz, aman shyqtyq. Bıyl maı tońǵysyz, jyly bolyp tur. Sonda da aldyn ala jasalǵan esep boıynsha ottyqtar ázirlenip, qosymsha azyq berile bastady. Dalaǵa kórik berip turǵan ań-qusqa abaı bolý – paryzymyz.
Ańmen qatar qustarǵa da jem beriledi. Park aýmaǵyndaǵy sırek kezdesetin qustar adamdar shashqan azyqtan nápaqa taýyp, jadyraǵan jaz aıyndaǵy qyzyǵy mol qus bazarynyń elesin eske salyp júr.
Aqmola oblysy
