Jazýshynyń týǵan jeri Atbasar qalasyndaǵy qalamgerdiń atyndaǵy mýzeı ujymy mazmundy shara uıymdastyrdy. Mýzeı dırektory Ulbosyn Danııarqyzy ádebıet álemin áspetteıtinderge jampoz jazýshynyń rýhanı álemimizge qosqan orasan zor úlesi týraly taratyp aıtyp berdi. Mýzeıde kóptegen qundy jádiger bar. Perzentteri tapsyrǵan jazý ústelinde qazaq halqynyń ótken dáýiriniń mańyzdy tustary qamtylǵan belgili shyǵarmasy «Kóshpendiler» trılogııasy ómirge kelipti. Osy ataqty shyǵarmaǵa jaryǵyn túsirgen jazýshynyń jaryqshamy da búginde mýzeıdegi sol ústeldiń ústinen oryn alǵan. Mýzeı qorynda jazýshynyń taspaǵa túsirilgen óz daýysy, «Muhıttan ótken qaıyq» romanynyń qoljazbasy, qoldanǵan jeke zattary men kitaptary jáne dombyrasy saqtaýly tur.
Atbasar qalasyndaǵy ortalyq alańnan boı kótergen Ilııas Esenberlınniń eskertkishi 2015 jyly ashylǵan. Búginde aımaqtyń tarıhı-mádenı ómirinde ózindik orny bar bul kompozısııa qurylysyna jazýshynyń urpaqtary men jalpy rýhanııat janashyrlary demeýshilik etken. Aýdandyq máslıhat tóraǵasy Nurjan Rahymov saltanatty sharadaǵy sóılegen sózinde Ilııas Esenberlın murasynyń ult tarıhyndaǵy alar ornyna toqtalyp, jazýshynyń qaıratkerlik isteriniń jarqyn tustaryn atap ótti.
Eskertkishke gúl shoqtaryn qoıý rásiminen soń shara qatysýshylary ádebı mýzeı zaldaryna ekskýrsııa jasap, «Jazýshy. Azamat. Patrıot» taqyrybyndaǵy jıynǵa qatysty.
Aqmola oblysy,
Atbasar aýdany
