Sýretti túsirgen – Jangeldi ÁBDIǴALYM
Konsertte án óneriniń sańlaqtary óner kórsetti. Qazaqstannyń eńbek sińirgen qaıratkeri, opera ánshisi Tolqyn Zabırova da arnaıy kelip, el aldynda Bıbigúl Tólegenova áýeletken áıgili «Gaýhartasty», Latıf Hamıdıdiń «Bulbulyn» Táttimbet atyndaǵy halyq aspaptary akademııalyq orkestriniń súıemeldeýimen shyrqady. Ol ánin áýeletip bolǵan soń, «Qarlyǵash kómeı qurbym-aý, Bir buraý emes, myń buraý. Qaı kúni, qandaı Anadan, Baǵyna eldiń týdyń-aý?», dep bastalatyn muzbalaq Muqaǵalıdyń Bıbigúl Tólegenovaǵa arnaǵan óleńin oqyp berdi. Kesh ıesin mereıtoıymen quttyqtap, «án ónerindegi ustazym, anam» dep qushaǵyna basty.
Qazaqstannyń eńbek sińirgen qaıratkeri Talǵat Ydyrysov bastaǵan jergilikti ónerpazdar Eskendir Hasanǵalıevtiń «Anaǵa sálem» ánin oryndady. Arqanyń maqtanyshy, talantty ánshi Rysty Raqymjan Evgenıı Brýsılovskııdiń «Qos qarlyǵashyn», Nurǵısa Tilendıevtiń «Kel, erkem, Alataýyma!» ánin orkestr súıemeldeýimen asqaqtatty. Keshte kileń klassıkalyq ánder shyrqaldy. О́ner kórsetken talanttar sahnaǵa shyǵyp, bulbul Bıbigúldiń batasyn alǵandaı áser qaldyrdy.
Konsert sońyna taman Bıbigúl Tólegenova sahnaǵa kóterildi. Oblys ákimi Ermaǵanbet Bólekpaev kesh qonaǵynyń ıyǵyna qundyz jaǵaly kamzol jaýyp, yqylas gúlin syılady.
– Sizdiń shyǵarmashylyǵyńyz Qaraǵandy óńirimen tyǵyz baılanysty. 2007 jyly Qaraǵandy qalasynda alǵash ret «Juldyzdar alleıasy» ashylyp, úlken shyǵarmashylyq keshińiz ótti. Sol jyly «Qaraǵandy – balalyq shaǵymnyń kýási» atty retro festıvaliniń tusaýyn da kesken edińiz. 2016 jyly qazaqtan shyqqan tuńǵysh ǵaryshker, Halyq qaharmany Toqtar Áýbákirovtiń 70 jyldyq mereıtoıyna oraı Astana, Qaraǵandy qalalarynda, Qarqaraly aýdanynda jerlesimizdiń mereıin asqaqtatyp konsert ótkizdińiz. Sizdi 95 jyldyq mereıtoıyńyzben shyn júrekten quttyqtaımyn! Baıtaq dalamyzdy bulbul únińizben terbep, ǵasyrǵa jýyq ýaqyt boıy sahnada óner kórsetip kele jatqan dara tulǵasyz. Týǵan jerińiz Semeıden bastalǵan mereıtoıyńyz Astana, Almaty qalalarynda ótip, Qaraǵandy qalasynda jalǵasqany biz úshin zor mártebe! – dedi aımaq basshysy.
Bıbigúl Tólegenova da qaraǵandylyqtarǵa basyn ıip, jyly lebizin bildirdi.
«95 jasqa kelgende Qazaqstandy sharlaý ońaı emes eken. Biraq men sahnanyń adamymyn. Sahna – ómirimniń máni. Dál qazir osy sahnada janym jadyrap otyr. Qaraǵandyny erekshe jaqsy kóremin! Munda shahtaǵa da túskenmin, qoıshylardyń arasyna da baryp án shyrqaǵanmyn. Arqadaǵy sińlim Rymbala Omarbekova ekeýmiz biraz jerdi sharladyq. Barshańyzǵa bas ıip alǵys bildiremin, dedi ánshi.
«Syrly aıaqtyń syry ketse de, syny ketpeıtini» ras-ty. Ǵajap tebirenisten soń Bıbigúl Tólegenova Aleksandr Zasepınniń «Pesnıa o vesne» ánin shyrqaǵanda halyq demin ishine tartty. Osy bir ǵalamat sátti tyńdarman uzaq kútken edi. Ánshiniń ózi de Arqa dalasynda án salǵandy ańsap kelgendeı. Bulbul úninen bultarmas yrǵaqty, buljymas áýezdi sezingen jurt tik turyp, qoshemet qyldy.
Qaraǵandy oblysy
