Atyraý oblysy Inder aýdanynda týǵan Tatıana Lıýbınanyń ulty orys bolsa da, jany qazaq. Bala kúninen qazaqsha óleń-jyrlardy jattap ósip, Abaı shyǵarmalaryn súıip oqyǵan.
Keıipkerimiz kópbalaly otbasynda dúnıe esigin ashqan. Anasy 13 balany ómirge ákelgen. Tatıana – segizinshi bala. Sondyqtan óte balajan. Meıirimdi. Júzinen nur tógilip turady. Búginde baýyrlarynyń bári joǵary bilimdi. Qazir ár salada elimizdiń damýyna óz úlesterin qosyp júr.
Bir qyzyǵy, olar qazaqy aýylda turǵan jalǵyz orys otbasy edi. Sonyń áseri bolar, kishkentaıynan aýyl balalarymen birge ósip, qazaq tilin erkin meńgerdi. Ata-anasy da jergilikti jurtpen jaqyn syılasyp, etene aralasty. Qazaqtyń salt-dástúri men ádet-ǵurpyn óte jaqsy bildi.
Ol 1984 jyly sol kezdegi Atyraý pedagogıkalyq ınstıtýtyn támamdaǵannan keıin týǵan aýylyna oralyp, ózi bilim alǵan orta mektepke muǵalim bolyp ornalasty. Sóıtip, ózine sabaq bergen aıaýly ustazdarymen birge qyzmet istep, olardan úlgi-ónege aldy. Tájirıbe jınady. Biliktiligin jetildirdi. Qazir Tatıana Lıýbına Atyraý qalasyndaǵy №3 mektep-gımnazııada eńbek etedi. Oqýshylarǵa qazaq tili men ádebıeti páninen sabaq beredi. Izdenimpaz ustazdyń ár sabaǵy qyzyqty. Mán-mazmunǵa toly. Ony oqýshylary da jaqsy biledi. Sondyqtan sabaǵynan qalmaıdy. О́z pánin sondaı jaqsy kóredi. Kóp izdenedi. О́zge ult ókilderiniń balalaryna qazaq tiliniń qyr-syryn úıretedi. Oǵan túrli oqý-ádisteme paıdalanady. Qazaq qalamgerleriniń shyǵarmalaryn oqyp beredi. Bir ereksheligi, sabaq ústinde oqýshylarymen qazaqsha ǵana sóılesedi.
«Memleket basshysy Qazaqstan halqy Assambleıasynyń XXXIII sessııasynda memlekettik tildi jan-jaqty damytý jóninde tapsyrma berdi. Sonymen qatar memlekettik tildiń mártebesin arttyrý men ony nasıhattaý týraly jaqsy oılar aıtty. Osy sózder meni qanattandyrdy. Bizdiń mektepte biraz ult ókiliniń balalary bilim alady. Bir jaǵynan, olardyń qazaq tilin úırenýge degen yntasy óte zor. О́ıtkeni olar memlekettik tildi bilmeı, qoǵamnan óz ornyńdy tabý qıyn ekenin túsinedi. Menińshe, elimizdiń árbir azamaty memlekettik tildi bilýi qajet. Bizdiń mektebimizde jetkinshekterge qazaq tilin úıretýge barlyq jaǵdaı jasalǵan. Árbir synyp oqýshylary toptarǵa bólingen. Munda ár balamen jeke jumys isteımiz», deıdi úlgili maman.
Tatıana Lıýbına bilim salasynda uzaq jyldan beri isteıdi. Biraz jetistikke de qol jetkizgen. Bir dıplommen shektelmeı, ekinshi joǵary bilim alǵan. Onyń syrtynda ǵylymı jumystarmen aınalysady. Búginge deıin birqatar ǵylymı materıaly jaryq kórgen. 2006 jyly Atyraý oblysynyń «Úzdik muǵalimi» atandy. Sondaı-aq «Bilim berý isiniń úzdigin» ıelendi. Biraq keıipkerimiz eń basty marapaty shákirtteri ekenin aıtady.
«Shynymen solaı baǵalaımyn. Bıyl jetinshi márte óz oqýshylarymdy bilim uıasynan ushyrdym. Solardyń árqaısynyń orny men úshin bólek. О́te qymbat. Endi bolashaǵy jarqyn bolsyn dep tileımin. Byltyr oqý bitirgen shákirtterimniń deni UBT-dan joǵary ball aldy. Buǵan qatty qýandym. Qazir olar Astana men Almatyda ǵana emes, sheteldegi tanymal joǵary oqý oryndarynda oqıdy. Keıbir shákirtterim ýnıversıtetti támamdap, elimizdiń jetekshi kompanııalarynda qyzmet isteıdi. Bul – men úshin úlken maqtanysh», deıdi aǵynan jarylyp.
Bilikti pedagogtiń shańyraǵy da shattyqqa toly. Baqytty otbasy. О́mirlik joldasy – qazaq. Ekeýiniń bir ul, bir qyzy bar. Qazir olardan tórt nemere súıip otyr.
«Marqum enem bir aýyz oryssha bilmeıtin. Ol kisi qaınym úılengennen keıin bizdiń enshimizdi berip, bólek shyǵardy. О́zim enemnen kóp dúnıe úırendim. Sondyqtan qazaqtyń kelini ekenimdi eshqashan umytpaımyn. Qazir biz – kópetnosty tatý otbasymyz. Qyzym koreıalyq jigitke turmysqa shyqqan. Al kelinim – qazaq. Balalarym men nemerelerim qazaqsha jaqsy sóıleıdi», dedi ol.
Byltyr Qazaqstan halqy Assambleıasynyń «Birlik. Jasampazdyq. О́rleý» atty HHHIII sessııasynda Tatıana Lıýbına Memleket basshysynyń qolynan «Eren eńbegi úshin» medalin aldy. Bul marapat ozat muǵalimniń abyroıyn asyryp, mereıin kóterdi.
Qaısar Qusaıyn
