Aýyr qylmys jasaǵandar jetkizildi

Reseı asqan kúdiktiler 2023 jyldyń qańtarynda Shymkent qalasynda ózge úsh adammen birlese jospar quryp, bas arazdyq negizinde tanysyn óltirýdi jón kórgen. Osy oıdy júzege asyrý maqsatynda kúdiktiler tapansha, metall shybyqtar men bıtalarmen qarýlanyp, qolǵap pen maska kıip, túnniń bir ýaǵynda jábir­lenýshiniń úıine basa-kóktep kirgen. Olar terezelerdi syndyryp, úıge kirip, jábirlenýshini soqqynyń astyna alyp, denesiniń saý-tamtyǵyn qaldyrmaǵan. Keıin úıdegi basqa adamdardy da uryp-soǵyp, oqıǵa ornynan ta­ıyp turǵan.

Jábirlenýshi aýyr dene jara­qattary saldarynan jedel jár­dem kóliginde qaza tapqan. Artyn­sha kúdiktilerdiń ekeýi izin sýytpaı ustalyp, ártúrli jazaǵa tartylǵan. Al qal­ǵan úsh kúdikti elden qashyp úl­gerip, olarǵa halyqaralyq izdeý jarııalanǵan.

О́tken jyldyń mamyr aıynda sybaılastardyń biri kórshiles elden ekstradısııalanyp, temir torǵa qamalǵan. Izdeýdegi qalǵan eki kúdikti byltyr shildede Reseı Federasııasynyń Máskeý oblysynda ustalyp, Qazaqstan Bas prokýratýrasynyń suraýy bo­ıynsha elge ekstradısııalandy.  Aıyp retin­de taǵylǵan qylmysty jasa­ǵany úshin olarǵa 15 jyldan 20 jylǵa deıingi merzimge nemese ómir boıyna bas bostandyǵynan aıyrý jazasy qarastyrylǵan. Osylaısha, atalǵan qylmystyq oqıǵany jasaýǵa qatysy bar barlyq kúdikti qolǵa tústi.

Sondaı-aq Bas prokýratýra qyzmetkerleri iri mólsherdegi alaıaqtyq jasap, elden jyraq­ta boı tasalap júrgen kúdik­tini Qazaqstannyń Belarýstegi elshiliginiń kómegimen atal­ǵan elden ony qylmystyq jaýap­tylyqqa tartý maqsatynda ekstradısııalady.

Ol 2022 jyldyń qańtarynan 2023 jyldyń tamyzyna deıingi kezeńde Túrkistan qalasynda bir top adammen birge kásip ashý úshin tegin aqshalaı grant alýǵa kómektesemiz degen syltaýmen 13 azamattyń qarajatyn qoldy qylǵan. Sóıtip, olarǵa 10 mıllıon teńgeden asa kólemde shyǵyn keltirgen.

Bul qylmystyń «shelek jala­ǵan» sybaılasy ustalyp qa­­lyp, sottalǵan. Al «aıran ishken» naǵyz kúdikti alaıaq­tyq áreketinen keıin elden qashyp ketip, ony tıisti organ halyq­aralyq izdeýge tapsyrǵan.

Byltyr qazan aıynda ol Belarýs jerinde ustalyp, jýyr­­da Qazaqstan Bas prokýra­týra­synyń ótinishi boıynsha elge jetkizildi. Qazir ol Astanadaǵy tergeý ızolıatorynda qamaýda otyr. Bul qylmysty jasaǵany úshin múlkin tárkileý arqyly úsh jyldan jeti jylǵa deıin bas bostandyǵynan aıyrý túrinde jaza qarastyrylǵan.