Jańa jumys oryndaryn ashý báseńdemeıdi

Premer-Mınıstrdiń orynbasary Berdibek Saparbaevtyń qatysýymen Petropavl aýyr mashına jasaý zaýytynda ótken basqosýǵa mınıstrlikterdiń, ulttyq kompanııalardyń ókilderi, jergilikti iri kásiporyndar men agroqurylymdardyń, vedomostvolardyń, salalyq kásipodaq uıymdarynyń jetekshileri qatysyp, úshjaqty kelisimder jasaldy. Jıyndy kirispe sózben ashqan aımaq basshysy Erik Sultanov óndiristik úderisterdi damytý, jumyssyzdyq deńgeıin azaıtý máselelerine toqtaldy. Byltyr kásiporyndar men uıymdar 1500 memorandým men 3600 ujymdyq shartqa otyrsa, bıyl 32 myń adamdy qamtıtyn 747 úshjaqty kelisim jasalǵan. B.Saparbaev jınalǵandardyń nazaryn búgingi kúnniń basty taqyrybyna aınalǵan álemdegi saıa­sı, ekonomıkalyq kúrdeli ahýal jaıymen tanystyryp, aldaǵy basty mindet jahandyq qarjy daǵdarysyn qazaqstandyqtar sezinbeıtindeı keshendi sharalardy jiti uıym­dastyrý, halyqtyń turmysyn jaqsartý jolyndaǵy áleýmettik mindettemeler men kepildikterdi sózsiz oryndaý qajettigine aýdardy. Byltyr elimizde ekonomıkalyq ósim 4 paıyzdy qurady. Ulttyq qordan bólingen bir trıllıon teńge tıimdi paıdalanylsa, 400 myńdaı jańa jumys oryndary qurylady. Ol úshin elimizde múmkindikter jetkilikti. Joldaýdan týyndaıtyn basty qaǵıdattardy basshylyqqa ala otyryp, kóp elderdi qamtyp otyrǵan qarjylyq qıyndyqqa tótep berýdiń ońtaıly joldaryn talmaı qarastyrý qajet. Elbasynyń basty talaby–jergilikti taýar óndirýshilerge qoldaýdy kúsheıtý, ónimderimizdi sapaly etip shyǵarý, jumys oryndaryn qysqartpaý, kerisinshe, jańa óndiris oryndaryn ashý. Soltústik Qazaqstan oblysy shekaralyq aımaqta turǵandyqtan, Reseımen qarym-qatynas jasaýdyń mańyzy zor. Jıynda oblys ákiminiń orynbasary Erlan Áýkenov óńirdiń ónerkásiptik áleýetin arttyrý, qazaqstandyq úlesti kóbeıtý, jumysshylardyń eńbek quqyqtary men kepildikterin qamtamasyz etý jaılaryn baıandady. «Jol kartasy-2020» baǵdarlamasyna qatysýshylardyń sany 12 myńǵa jetip, 669 adam jeke kásibin ashsa, 442 adam násip kózderin odan ári keńeıtken. Ortasha aılyq jalaqy 10 paıyzǵa ósip, jumyssyzdyq deńgeıi 4 paıyzǵa deıin tómendegen. Úkimettiń naqty qoldaýy arqasynda oblystaǵy mashına jasaý kásiporyndarynyń tapsyrysy búginde 22 mıllıard teńgege ósken. Baıandamashy sheteldik kompanııalarmen tyǵyz baılanystyń ornyqqanyn aıta kelip, tıisti vedomostvolar tarapynan sheshimin kútken keı problemalardy tilge tıek etti. Máselen, «Bogvı» fır­masynyń bankrotqa ushyraýy taýar óndirýshiler úshin eleýli qıyndyq týdyryp otyrǵan jaıy bar. Ásirese, onyń quramyna kiretin 24 sharýashylyq astyq ósirýde biraz qıyndyqtar kórip keledi. О́ıtkeni, jer telimderi men 4 elevator kepil retinde bankterge qoıylǵandyqtan, irkilister kóp. Sol sııaqty máskeýlik «Transavto» kompanııasynda ortasha eńbekaqy mólsheri oblystyq kórsetkishten 25 paıyzǵa az. Petropavl aýyr mashına jasaý zaýytynyń bas dırektory Qýanysh Bıshimov ujymda 1500 adam eńbek etetinin, ortasha aılyq eńbekaqy 100 myń teńgeden aınalatynyn, 7,5 mıllıard teńgege tapsyrystar túskenin jetkizdi. Byltyr 260 mıllıon teńgeniń áleýmettik mindettemeleri oryndalsa, bıyl bul kórsetkishti 300 mıllıon teńgege ulǵaıttyq. Jumysshy-qyzmetkerlerge eńbek, turmys jaǵdaılaryn jasaý sharalary ujymdyq kelisimde jan-jaqty kórinis tapqan, dedi óz sózinde kásiporyn basshysy. – Osy kezdesýdiń aldynda kásiporynnyń tynys-tirshiligimen tanysyp, ujymmen kezdestim. Aýyr ónerkásip salasyn damytý Prezıdent tarapynan árkez úlken qoldaý taýyp keledi. Bárimizdiń kúsh-jigerimiz ortaq maqsatqa arnalyp, daǵdarysty boldyrmaýdyń, aldyn alýdyń irgeli mindetteri tur, degen Premer-Mınıstrdiń orynbasary otandyq taýar óndirýshilerge qoldaýdy odan ári kúsheıtýdi júktedi. Jıyn sońynda oblystyq ákimdik, kásipodaq jáne iri kásiporyndar men ulttyq kompanııalar arasynda 18 mıllıard teńgeni quraıtyn 14 memorandýmǵa qol qoıyldy. О́mir ESQALI, «Egemen Qazaqstan». Soltústik Qazaqstan oblysy.