Memlekettik rámizdi qorlaý – kórsoqyrlyq

Memlekettik týdy qorlaýǵa bolmaıdy. Ol – eldigińniń, táýelsizdigińniń belgisi. Azamat bolyp otbasyńdy asyrap júrseń, seni qanattyǵa qaqtyrmaı, tumsyqtyǵa shoqtyrmaı tóbeńdi kókke jetkizetin Otanyńnyń sımvoly. Biraq, kókiregi kór jandar olaı oılamaıdy eken. Jurt bolyp qas­terlegen memlekettik rámizdi qorlaý taıaz jandarǵa eshteńe emes. Shymkentte Memlekettik týmen qoqys shyǵarǵan jumysshylar anyqtaldy. Osyǵan baılanysty qala ákiminiń baspasóz qyzmeti arnaıy brıfıng ótkizip, aqparat quraldary ókilderine túsinik berdi. Oqıǵa Shymkentte oryn alǵany anyqtaldy, dedi baspasóz hatshysy Nurlybek Jeńisbek. Ál-Farabı ­aýdany aýmaǵyn tazalaǵan qyzmet­ker­ler «Bek-Asyl Servıs» JShS-inde jumys jasaıdy. Júk kóligi de osy mekemege tıesili. Qylmystyq kodekstiń 372-babyna sáıkes elimizdiń Memlekettik rámizderin qorlaý 2000 aılyq eseptik kórsetkishke deıingi mólsherde aıyppul salýmen nemese sol mólsherde túzeý jumystaryn atqarýmen jazalanady. Búginde eki jumysshy men júrgi­zýshiden quqyq qorǵaý ókilderi jaýap alyp jatyr. Olarǵa da jan kerek. «Biz barǵanda tý qulap jatyr eken. Ústine qoqys tógilipti. Biz bar bolǵany týdy qoqystan tazarttyq», deıdi kúdiktiler. Memlekettik týdy qorlaý birinshi ret bolyp otyrǵan jaǵdaı emes. Eldigińniń nyshanyn aıaqasty etý – naǵyz kórsoqyrlyq. Olardy aıamaý kerek. Baqtııar TAIJAN, «Egemen Qazaqstan». Ońtústik Qazaqstan oblysy.